Vawiin khan MLA Inthlanpui 2018 lo awm tura Lawngtlai District chhunga constituency pathuma polling station 161-a Presiding Officer (PRO) leh 1st Polling Officer (PO) tura ruatte tan Lawngtlaia Govt Region HSS-ah training buatsaih a ni.

He hunah hian PRO leh 1st PO tura ruatte an kal tha hle a. 1st session-ah polling official-te'n postal ballot hmanga vote an thlak theihna turin Form-12 buaipui a ni a. Polling official-te hian Form-12 dah khatin postal ballot hmanga vote thlak dilna an theh lut a. Hei hi Postal Ballot Nodal Officer, SDO (Sadar) Pi Rochuangkimi Khenglawt MCS chuan a buaipui a ni.

2nd session-ah EVM hman dan leh enkawl dan (EVM hands on training) leh polling official-te tih tur leh mawhphurhna hrang hrang zir ho a ni a. Polling official-te hi hmun ngaah inthen darhin, District Level Master Trainer-te - Pi Carolyn LB Khiangte MCS, Pu Vabeimozachhi Chozah MCS, Pu Lalsanglura MCS, Pi Christina Lalmuanzuali MCS leh Pu Timothy R. Lalhmangaiha MCS te'n training hi an pe a. Sawi hona leh zawhna leh chhanna hun hman nghal a ni bawk.

Lawngtlai District-ah hian polling station 161 awmin, he’ngah hian polling official pali zel - presiding officer bakah, 1st, 2nd & 3rd polling officer-te an duty dawn a. Polling official mi 644 leh reserve mi 192 an awm dawn a ni. Lawngtlai District-a constituency pathumah hian hmeichhia chauh duty-na tur pink polling station pakhat theuh siam a ni a; chu'ngte chu - 36-Tuichawng-ah Saizawh West Polling Station, 37-Lawngtlai West-ah Chawnhu Polling Station leh 38-Lawngtlai East-ah Lawngtlai Electric Veng Polling Station te an ni.

Naktuk hian 2nd & 3rd Polling Officer-te tan training buatsaih ve leh a ni ang.