Vawiin khan MLA Inthlanpui 2018 atana Lawngtlai District Level Standing Committee chu District Election Officer, 37-Lawngtlai West Constituency-a Returning Officer ni bawk Pu N. Chakhai MCS hovin Lawngtlai DC Conference Hall-ah an thu khawm a. Inthlan chungchanga hriat tur pawimawh hrang hrang inhrilhfiah a ni.

He hunah hian 36-Tuichawng Constituency-a RO Pu R. Lalremsanga MCS, 38-Lawngtlai East Constituency-a RO Dr Andrew H. Vanlaldika MCS, Lawngtlai SP Pu Amit Goel IPS leh Election Officer Pu Lalrinawma MCS te pawh an tel a. Lawngtlai District chhunga political party hrang hrang leh tlawmngai pawl hrang hrang ai awhte koh khawm niin, vawiin (02.11.2018)-a election notification chhuah a nih thu leh nomination theh luh theih a nih tawh thu te, model code of conduct chungchanga political party-te hriat tur pawimawh te, election expenditure monitoring chungchang, counting hall & strong room ruahman dan, venhimna ruahman dan, pianphunga rualbanlote tana ruahmanna leh polling party-te tana ruahmanna siam dan hrang hrangte hrilhfiah an ni a. Zawhna leh chhanna leh sawi hona hun hman a ni bawk.

Lawngtlai District-a inthlan hmachhawn tura inbuatsaih ngai hrang hrangte chu peih fel tawh niin, a tahtawla tih tur ruahmante pawh tha taka hlen chhuah zel a ni a. Inthlan felfai leh muanawm tak a awm theih nan hma lak zel a ni.

Attachment

  • Loading attachment...