No.4076/2021-2022
Aizawl the 22nd February, 2022: Vawiin khan Champhai District chhunga kut hnathawktu hlawhtling mi 10 te leh thisen pe hnem ber te chawimawina hun Circuit House Champhaiah Bawrhsap Pi Maria C.T Zuali, hova hman a ni. Hemi rual hian MYC leh District Skill Committee bultum ei leh in siam zirchhuakte hnenah hmanrua hlan nghal a ni.

He hun Pu Obed Lalmalsawma, SDC kaihhruaiah Bawrhsap Pi Maria C.T Zuali chuan thusawiin, District chhunga kawng hrang hranga mi hlawhtlingte chawimawina hun hman dan tura ruahmanna an lo siam tawh dante a tarlang a, kuthnathawktuten thawhrimna leh sawrkar thupek chhuahte an zawm thin avangin hlawhtlinna ropui tak an chang tih a sawi a. ASF laka Champhai a him theihna turin nasa taka hmalak a nih thu sawiin, hei hian ASF lakah Champahi District chu nasa takin a veng him tih a sawi bawk.

Bawrhsap chuan hri leng vanga ramrite khar a nih hnuah Mizoram chu ei leh barah kan intodelh loh zia a lo lang chhuak tih sawiin, chu chuan mizote thinlungah nasa takin tanlak duhna a pe a, mi tam takin ranvulh lamah te tan an la a, hlawhtling tam tak an awm bawk tih a sawi a, tan la thar zel tura a duh thu a sawi bawk. Kuthnathawktute tan hmachhawp hrang hrang an duan mek thu leh hmalakna tur kawng tam tak ala awm thu sawiin, hlawhtling ngei tura tan la sauh sauh turin a sawm nghal a. Midangte tana thisen hlu tak pe tute chhuanawm a tih thu sawiin, Champhai District chhunga thisen pe tam ber, unit 76 lai petu Pu PC Lalchuangkima inpekna chu chhuanawm a tih thu a sawi bawk.

Hei bakah hian MHIP te hmalaknain eizawnna rintlak an neih theihna tura ei leh in siam dan kawng hrang hrang zir turin mi 12 te training tura tirh chhuah an nih thu leh hlawhtling taka an zirchhuah thu sawiin, an zirnate chu chhunzawm zel tur leh an thiamnate rula raw neih mai lova tangkai pui a, eizawn nana hmang ngei tura a duh thu a sawi a. Ei leh in siam an zir zawh tak chu an tan rahbi thar a ni tih hria a, hmasawn zel tum turin a fuih bawk.

He hun ah hian kuthnathawktu mi hlawhtling mi 10 thlanchhuahte hnenah chawimawina thuziak leh pawisa fai hlan an ni a, Serthlum quintal 250 tharchhuaktu Pu Zamnanga, Selam, Grape quintal 100.24 tharchhuaktu Pu Lianthuama, Ngur, Zikhlum quintal 140 tharchhuaktu Pu Lalnunchhuanga, Samthang, Tomato quintal 177 tharchhuaktu Pi Lamramnghaki, Tuipui, hmarcha quintal 16 tharchhuaktu Pu Vaikhama, Thekte, Vawk 53 vulh mektu Pu C. Lalzawmliana, Farkawn, Vawk 93 vulh mektu Pu C. Vanlalvena, Buang, Buh quintal 102.5 thartu Pu KC Doliana, Vangchhia, Buh quintal 50.5 thartu Pu Lalnghinglova, Tualcheng leh Vaimim quintal 102 tharchhuahtu Pu Endokhama, Vaikhawtlangte hnenah chawimawina hi hlan an ni a, anni bakah hian Champhai District-a thisen pe tam ber Pu PC Lalchuangkima, Bethel Veng, thisen Unit 76 pe tawh hnenah chawimawina thuziak leh pawisa fai hlan a ni bawk.

Heng bakah hian MYC leh District Skill Committee bultum ei leh in siam dan Thingsulthliah atanga zirchhuak mi 12 te hnenah ei leh in siamna hmanrua tangkai tak takte hlan nghal an ni bawk a ni.