501/2024-2025

Champhai, the 17th May, 2024: Vawiin chawhma dar 11:00 khan District Bawrhsap Pu James Lalrinchhana, Chairman, District Disaster Management Authority, Champhai District kaihruaiin lirnghing thlen thulha chetlak dan tur nunchan zirna, May ni 21, 2024 chawhma dar 11:00 a neih tur chungchang DC Conference Hall-ah sawiho a ni.

He hun kaihruaitu Pu James Lalrinchhana chuan Mizoram chu lirnghing lian tham thlen theihna Seismic Zone V hnuaia awm a nih thu sawiin, kum hmasa lamahte Champhai District-ah lirnghing tum engemawzat a thlen thu leh hengte avang hian vanduaina thleng theite ngaihtuah ran chunga chetlak dan tur inzirtirna tha tak neih a pawimawh thu a sawi a. District Level Mock Drill on Earthquake chuan chhiatrupna thlen thulha chetlak dan tur chungchangah mipuite zirtirna a pek ngei a beisei thu leh hlawk taka hman a nih ngei a beisei thu a sawi a. Mawhphurhna hrang hrang neite chu theihtawp chhuah turin a chah nghal bawk.

Incident Commander tura ruat Addl. DC Pu K. Zorammuana'n District Level Mock Drill on Earthquake kalpui tura mawhphurhna nei hrang hrangte leh an chanvo theuhte bakah ruahmanna duan tlangpuite a sawifiah nghal bawk.

District Level Mock Drill on Earthquake nei tura ruahmanna duan ang chuan May ni 21, 2024 chawhma dar 11:00 hian siren ti riin lirnghing a thlen thu hriattirna pek a ni dawn a. Chhiatna thlenna tura ruat Springdale Academy Zotlangah lirnghing thlen thulha chet lak dan tur nunchan zirna neih a ni ang a; hemi rual hian lirnghing avanga harsatna dang thleng ve nghal tura ruahman Zotlang Bazar (Kangmei chhuak) leh Tourist Lodge thlang, New Champhai (Leimin) avanga harsatna thlengte pawh buaipuiin mock drill neih a ni dawn bawk a. Mock Drill neih a nih dawn avang hian DDMA Champhai District chuan hemi hun chhung hian mipuite chiai lo turin a ngen a ni.

District Level Mock Drill on Earthquake atan hian Circuit House Champhai chu District Emergency Operation Centre (DEOC) atan ruat niin, Circuit House tualzawl chu Staging Area atan ruat a ni a. Hemi kaihhnawihah hian May ni 20, 2024 chawhnu dar 2:00 hian Springdale Academy-ah Zirtirtu, Zirlai, NDRF, QRT, Zotlang VC leh YMA te tan chipchiar zawka training buatsaih tum a ni.

Vawiin meeting-ah hian chhiatrupna thlen thulha che chhuak nghal thei tura Line Department hrang hrangte inpuahchah dan bakah Mock Drill atana inpuahchah tulte sawiho a ni a. Tawnhriat neihte bakah Mock Drill kalpui tawh dante sawiho a ni a. Hmasawn ngaihna laite tarlan niin, hlawhtling taka Mock Drill neih a nih theih nana pawimawh leh tul ni a hriat hrang hrangte chipchiar taka sawiho a ni bawk.