502/2024-2025

Hnahthial the 17th May 2024: District Consultative Committee (DCC), District Level Review Committee (DLRC) leh District Level Security Committee (DLSC) thutkhawmna chu vawiin khan DC Meeting Hall, Rallangtlang, Hnahthial ah DCC Chairman, District Bawrhsap ni bawk Pu Chuauhnuna kaihhruaiin neih a ni a. District Bawrhsap chuan Hnahthial District tana Annual Credit Plan 2024-2025 chu lawm takin a tlangzarh nghal bawk.

Thutkhawm hmasa in a an lo rel tawh hmachhawp hrang hrang bawhzui a nih dah thlirletna chu vawiin meetingah hian neih a ni a, bank aiawhte chu  harsatna laka chhungkaw tam tak khaichhuak thei tur leh khawtlang hamsawnna thlen thei turin theihtawp chhuah zel tura chah an ni bawk. Vawiin meeting in a tarlan danin mipui hamthatna tura Sorkar laipui duan Social Security Scheme hrang hrang- PMJJBY, PMSBY leh APY  ah te Hnahthial District chhunga bank awmte dinhmun en ho  a ni a, tun dinhmunah  SBI ah PMJJBY hnuaiah 2878 an inziaklut a, PMSBY ag 3160 in ziaklutin APY ah 5293 an in ziak. MRB ah  PMJJBY inziaklut mi 4480 an awm a, PMSBY ah mi 4017 awmin APY ah mi 5106 an bawm. MCAB ah mi 818 in PMJJBY ah an in ziaklut a, PMSBY ah mi 298 inziaklut in APY ah mi 684 an inziaklut a ni. Loan rul tha lo (Non performing assets) chungchang pawh sawi ho a ni a, quarter hmasa nen tehkhinin a tlahniam hret hret chu thu lawmawm tak a nih thu tarlan a ni. Banking leh kaihhnawh pawimawh mipui hnena hrilhhriatna (Financial Literacy Camps) chu a tlem berah thlatin vawikhat tal neih a tul thu tarlan niin bank a thawk te chu tang leh zual tura hrilh an ni a, Hnahthial District a bank branch hrang hrang hnuaia savings account leh current accounts te chu March 2025 hmaa digitalized vek tawh tur a ni tiin tun dinhmunah 48% chiah digitalized a nih thu tarlan  a ni bawk.

Pu Lalhlimpuia, Chief Manager, Lead Bank Office, Lunglei chuan Credit/Deposit Ratio- banka mipuiin sum an dah luh (Deposit) zat za zela bank in mipuia sum an puktir (CREDIT) zat chhutna ah quarter hmasa a  58.75% chu tun quarter ah 60.73% a kai thu a tarlang a, RBI in  a bituk zat za zela 60 an kai  ta chu thil lawmawm tak a ni, a ti. Credit disbursement under ACP (Non- Priority Sector) a zirna (education) bik achievement a la nil chu zirlaite leh mipuiah inhrilhhriatna uar leh zuala pek  angaih thu tarlan  ani a, a mamawhtu dik tak ten tangkai taka an hman theih nan theihtawp chhuah tura ngen an ni. Hnahthial District a Bank 3 awm (SBI, MRB leh MCAB) ten KCC Loan an pek dan te, MzSRLM hnuaia Self Help Group  loan an pekchhuah te, PMEGP leh NULM hnuaia loan an pekchhuahte thlir ho a ni bawk a, line department te te leh bank te chu thawhhona tha zawk nen mipui harsatna sutkian  a nih theih dan tur ngaituah ho nniin ruahmanna leh  rawtna ngaihthlak ho nghal a ni bawk a ni.

Vawiin thutkhawmah hian Line Department hrang hrang hotute bakah Chief Manager, LBO Lunglei, NABARD Lunglei, Lead District Office, RBI, Aizawl, Regional Manager MRB, RBO, Lunglei te bakah Hnahthial district chhunga bank branch hrang hrang aiawhte an tel a ni.