503/2024-2025

Aizawl the 17th May, 2024: May ni 16-17, 2024 khan Mizoram Science, Technology & Innovation Council (MISTIC) leh BRIC-Institute of Bioresources and Sustainable Development (BRIC-IBSD) ṭangkawp chuan Aizawla IBSD laboratory-ah thianghlim zawka Bekang umdan leh Bioresource hausakna hmanga ram hmasawnna thlen theih dan tur zirhona an buatsaih.

He zirhona ni khatnaah hian Aizawl leh a chhehvela bekang umtute leh sumdawnna atana hmang (entrepreneur) te hnenah mihringte tana ṭangkai leh hlauhawm loh chi bacteria bacillus subtillis aṭanga bekang thianghlim siam dan training pek a ni a, a tel ten an hlawkpui hle a ni.

A ni hnihnaah hi R.B. McCabe Hall, Aijal Club-ah hman niin, he hunah hian 'Bioeconomy from Bioresources: Promoting Traditional Foods and Medicinal Plants of Mizoram for Vikshit Bharat' tih thupui hmangin seminar neih a ni a. Seminar hi Prof. Pulok K. Mukherjee, Director, BRIC-IBSD chuan kaihruaiin, Prof. Dibakar Chandra Deka, Hon’ble Vice Chancellor, Mizoram University chuan khuallian niin seminar hi a hmanpui. Er. H. Lalsawmliana, Chief Scientific Officer & Member Secretary, MISTIC chu Khualzahawm a ni thung.

Khuallian Prof. Dibakar Chandra Deka chuan thusawiin kum 2047-ah India ram chu 'Developed Nation' zingah hlan kai tum mek a ni a, Mizoram pawh ṭan mar ve pat a ngai dawn a ni a ti a. Ram hausaknate hi a leilung mawina leh ṭhatna tichhe lova uluk taka hman ṭangkai a ṭul thu a sawi bawk. Khualzahawm Er. H. Lalsawmliana pawhin Mizo chawhmeh um chi zinga pathum - bekangum, saum leh aium te chu zirchian mek a nih thu tarlangin, State pawn leh India ram pawn thlenga thawnchhuah a nghahlelhawmzia thute a sawi.

He seminar-ah hian Scientific Institution hrang hrang atanga mi thiamte, BRIC-IBSD aṭangin Dr. Pardeep K. Bhardwaj, Dr. Jitendra K. Shukla, Dr. K. Jeyaram te, MISTIC aṭangin Dr. Lalchhandami Tochhawng te, Mizoram University aṭangin Prof. Rambir Singh leh Bamboo Research Center aṭangin Shri Sandeep Yadav te chuan kalkhawmte an zirtir a ni. He zirhona hi entrepreneur te, bekang umtute, research scholar te leh zirlai bakah Sorkar Department hrang hrang aṭangin an chhim a ni.