Sawrkar laipui hmalakna hnuaia April Ni 16 atanga neih tan tur naupang thla 9 atanga kum 15 inkarte hnena Measles (Sentut) leh Rubella (German Sentut) laka invenna vaccination campaign chu Champhai District-ah chak taka kalpui mek zel a ni. Vaccination hi District chhunga naupang thla 9 atanga kum 15 inkar mi 40,461 hnena pek tum a ni a. Measles Rubella (MR) Vaccine hi April ni 16, 2018 atanga pek tana ni 30 chhunga District chhunga naupang thla 9 atanga kum 15 inkar zawng zawngte pek vek tur a ruahman a ni a. A tir hapta hnih chhung chu zirna in zawng zawngah pek tur niin, a dawt hapta hnih chhung chu vantlang/khawtlangah kalpui a ni ang a. A tawp hapta khatah chuan  pek hmaih palh awmthei venthawn nan thual nawnna Sweeping phase neih tur a ni ang.

MR Vaccination Campaign kal mekah tukin zing dar 9 khan Health Department buatsaihin BC Lalthlamuana Academy Sikul naupangten hemi chungchang puanzara inhrilhriatna kawngzawh an nei a, MR Vaccination chungchanga hriatngai leh nihphungte ziaka tar hmangin an entir a ni.  Kawngzawh hi Champhai Vengsang  Biak In kawn atanga tanin  Darthangvunga Traffic Point thleng  zawh a ni.

Chawhma dar 10 khan Govt. New Comprehensive Model Middle School, Venglaiah Parents-Teachers meeting neih leh niin he hunah hian Dr R.Lianmawia, DIO-in zirtirtu leh school naupang nu leh pa kalkhawmte hnenah MR Vaccination chungchang leh kalpui anih dan tur tlangpui tarlanna leh zirtirna a nei a ni.

Hemi hnu hian Champhai Centre huamchhunga ASHA, Anganwadi Worker zawng zawngte tan zing dar 11 khan MR Vaccination chungchanga Sensitization Workshop, Venglai Community Hall-ah  buatsaih a ni a. He hunah hian Vaccine pek anih dan tur leh chak zawka hnathawh anih theihna tura hriattur pawimawh angte inzirtirna leh entirna hunte hman a ni bawk.

Vawiin vek chawhnu Dar 2 khan Champhai District CMO Dr Vanlalnghaki leh DIO Dr R. Lianmawia te chuan MJA Champhai District hruaitute kawmna hun I&PR Conference Hall, CHANEM Building-ah an nei a. Tunthla (April) Ni 16 atang hian Champhai District pumpuiah Naupang thla 9 atanga kum 15 inkar mi 40460 te hnena he hri danna damdawi hi pek vek turin hma an la mek zel a. Hri danna damdawi mipakhat hnena pek hi Rs 200/- man zel anih dawn thu CMO Dr. Vanlalnghaki chuan tarlangin,  he Sentut natna chi khat (German Measles Rubella) hi Sentut pangngai aiin thawk na lo zawk mahse,  taksa chhungril lamah chhiatna nasa zawk a thlen theih vangin he natna laka mitinte an him theih nan Sorkar laipui chuan theih tawp a chhuah mek thu a sawi a. Zawhna leh hriat duhte zawhna te neih niin Health Department hotute chuan chak zawka information pek anih theihna tua thawhpuiah MJA te chu an sawm nghal a  ni.

Kum tin khawvel pumpuiah Sentut avang hian naupang 1,34,200 an thi ziah anga chhut a ni a.  Chung zinga mi 49,200 (za zela 36) te chu India ram mite an ni. Tin, German Sentut vang hian piansualna chi hrang hrang leh naute thihna nuaikhat vel awm thinin chung zinga mi 40,000 vel zet chu India rama thleng a ni. Hengte anih avang hian SEAR (South East Asian Region) chuan hmalain kum 2020 hi chuan   naupang thahnem tak suattu natna hi tihrem anih ngei theihna turin hma a la a. India ram sawrkar pawhin MR Campaign neih hi a lo rel tawh a, hemi atan hian  Mizoramah pawh April ni 16, 2018 atangin kar 5 chhung Vaccination Campaign hi neih tura ruahman a ni a. Hemi chhung hian School, Anganwadi, Sub-Centre leh Community Hall-ah te Vaccination hi pek tur a ni a. Tun dinhmunah hian India ram state 15-ah beihpui hi thlak tawh niin naupang vaibelchhe 8 te vaccine him taka pek an ni tawh a ni. Kan ram a lo him zawka he natna laka kan lo fihlim theihna atan Health Department lama thawktute chuan mipuite tawiawmna leh puihna a mamawh a; vaccine lakna hmun ruat bikahte naupang thla 9 atanga kum 15 inkarte kaltir vek turin nu leh pate a sawm nghal bawk a ni.