Vawiin chawhnu Dar 2 khna I&PR Conference Hall, CHANEM Building-ah  Champhai District Media Certification and Monitoring Committee (MCMC) buatsahin Media mite pualin inthlan kaihhnawih training buatsaih a ni a. He hunah hian Dr Lallawmkima, DIPRO Champhai leh Pi Esther Leihang, SDC Champhaite chuan inthlan vuakveta  Media-te hriat  leh zawm tur dan hrang hrangte hrilhhriatna an nei a ni.

Training-ah hian Media Certification and Monitoring Committee (MCMC) tobul leh hnathawh hrang hrangte zirho niin inthlan lai vela MCMC thuneihna leh hnathawhte thlirho a ni a. Committee kaltlangin Electronic Advertisement, Bulk SMS, Voice Message te endik hmasak a phalna pek chauh thin a ni a, therhlo leh sum um vanga news item tihchhuah thin Paid News pawh uluk taka enzui thin a nih thu tarlan a ni a, Paid News-te a tul anga bawhzuia hremna  lekkawh theih  a  ni. He hunah hian Media mite chu tawngkam mawilo, chi inthliarna leh awn lam nei ang zawnga thuchuahte, thu dik tawklo leh belhchian dawllo laka fimkhur tura chah an ni a. Electronic Media hmanga advertisement siam tur ten nithum hmain dilna form hmangin MCMC-ah dilna thlen thin tur a ni a, chu dilna chu MCMC Member ten an lo thlir ho anga Model Code of Conduct palzutna a awm loh chuan an lo chhuah phalna an lo pe thin dawn a ni.  Print Media advertisement chuan Section 171 H of IPC dan angin Candidate pawmpuina a nei tur a nih thu leh thil chhutu pawhin Publisher Declaration, Address leh Printer information leh Address kimchang bakah Copy zat an chhut angaih thin thu tarlan a ni bawk a.

Heng bakah hian Social Media kaltlanga Model Code of Conduct palzut anih theih dante pawh sawiho a ni a, a tul ang zela dan bawhchhiatna venho zel tha tih tlan a ni a. Vote thlak hun darkar tawp  atanga chhiar leta darkar 48 chhunga Pre poll leh Election lam thil engmah thehdarh phal loh leh inthlan zawh darkar chanve chhunga Exit Poll  siam  leh thehdarh khap tlat anih thu training-ah hian sawilan a ni a. Election hunchhunga Media kaihhnawih Rate chart duante enho  niin Media advertisement Form fill up ngai angte zirho a ni a. Zawhna leh chhanna hunte siam niin hun hlawkthlak tak hman a ni. 

Training-ah hian Pu C.Lalhnunpuia, President MJA Champhai District chuan District pum huapa Vote thlak percentage tam zawk a awm theihna tura hmalaka tanrual angaih tak meuh thu a sawi a. Vote thlak chu khua leh tuite mawhphurhna anih hriaa mitinten ngaihpawimawh theuh nise a duh thu a sawi a. Sawrkar lam pawhin tanla thar zel se a duh thu leh hemi kawngah hian MJA lam pawhin theihtawpa tawiawm zel an tum thu a sawi bawk a ni.

District Election thuneitute chuan Media tawiawm tawh thinnaah lawmthu a sawi a, kan hma lawka Lok Saabha inthlan lo awm turah pawh dik leh felfai taka neih anih theihna turin Media mite tawiawmna a ngen a ni.