Vawiin khan Champhai DC Conference Hall-ah March Ni 12 a zan khat riaka Champhai rawn tlawh tur, Mizoram Governor Pu P.S. Sreedharan Pillai lo dawn sawn dan tur chungchang Bawrhsap Pu Mark Lalthanliana hova rel a ni.

Thukhawm chuan zan khat riaka Champhai rawn tlawh tur Mizoram Governor Pu P.S. Sreedharan Pillai chu ropui taka hmuah nise, a chamchhunga hun tha leh hlawkthlak tak a hman theihna tura inpuahchahna tha taka kalpui nise a ti a. Champhai a cham chhunga a tlawh tur hmun hmate enfiah nise tiin, a lo dawngsawngtu turte pawh tha taka inpuahchah tura ngen leh hriattir an ni a. Sawrkar department hotute pawh mahni department enkawl theuh hmalakna langsar leh hlawhtlinna te chhawpchhuak thei tura inring tura tih an ni bawk.

Meeting chuan Mizoram Governor chu Champhai Helipad-a rawn tum hunah District thuneitute’n lo hmuah nise tiin, a mah lo hmuaha lawmna pui ber chu Circuit House tualzawlah neih nise ti a relin, Sawrkar hnathawkte, Khawtlang hruaitu leh NGO aiawhte nen ropui taka lo lawm nise tih a ni a. Meeting chuan zan khat riaka Champhai rawn tlawh tur Mizoram Governor pualin Cultural Programme-te huaihawt nise a ti bawk.

Ruahman dan chuan Mizoram Governor Pu P.S. Shreedharan Pillai hi March Ni 12, 2020 zing dar 9:00-ah Aizawl atangin Helicopter-in Champhai a rawn pan dawn a. Vantlang huap hmuahna inkhawm Circuit House kawta neih anih hnuah, Government Champhai College, Mazuia Memorial Home (TNT) leh District Hospital, Champhai a tlawh hnuah Land Custom Station, Zokhawthar a tlawh leh dawn a, tlai lamah Champhaia Sawrkar department hrang hrang hotute nen department hnathawh langsar zualte thlirin inkawmhona hun an hmang dawn a ni.

Mizoram Governor hian March Ni 13 zing dar 9 hian Champhai chhuahsanin Khawzawl District a pan ve leh dawn a, Khawzawl Bawrhsap leh khaw mipuite’n ropui takin Field No. 1, Zuchhip Vengah an lo hmuak dawn a, Khawzawl damdawi In a tlawh ang a, hemi hnu hian Govt. Khawzawl College tlawh lehin, Khawzawla sorkar department hotute nen meeting an nei zui nghal dawn a. Khawzawla hun a hman zawh hnuah Aizawl panin a let leh dawn a ni.