Vawiin chawhnu khan DC Conference Hall, Champhaiah Mizoram Kailawn-2019 buatsaih tur puala inhrilhhriatna leh zirtirna neih dan tur District Bawrhsap Dr Naveen Aggarwal hova rel a ni.

Thukhawm chuan Mizoram Kailawn 2019 chungchanga inzirtirna chu  July Ni 16, 2019 hian Government Champhai College Multipurpose Hall-a neih nise tiin a rel a. Mizoram Kailawn 2019 chungchanga mipuite zirtirna hun hmang tur hian Entrepreneurship lama tui mi te chu  sawmin, NGO aiawh, Media, College Zirlai, Self Help Group, Sumdawnna lama tuimite leh mahni kutkawih thiamna hmanga eizawnna ngelnghet din tumte chu tel vek turin a sawm a ni.

Mizoram Kailawn vawi thumna neih tur pualin District hrang hrangah Entrepreneurship zirtirna leh chawilarna kalpui mek a ni a.  Champhaiah pawh Mizoram Entrepreneurship Development Monitoring Committee (MEDMOC), Indian Institute of Management Calcutta Innovation Park (IIMCP) leh Mizoram Consultancy Group (MzCG) tangkawp buatsaihin Govt. Champhai College Multipurpose Hall-ah  Mizoram Kailawn-2019 chungchang inzirtirna hun neih a ni dawn a. He hunah hian Mizoram Kailawn awmzia, a dil dan leh  tul hrang hrangte, IIM Calcutta-Innovation Park local partner Mizoram Consultancy Group (MzCG) leh District Master trainer ten  an nei dawn a,  Zirtirna hun hman zawh hnu hian zawhna leh chhanna hun neih a ni dawn bawk a ni.

Third Mizoram Kailawn, 2019: Business Plan Contest and E-Summit hi June Ni 17 khan Mizoram Sawrkar Chief Secretary Pu Lalnunmawia Chuango, Mizoram State Entrepreneurship Development Monitoring Committee (MEDMOC) Chairman ni bawk chuan Aijal Club-ah a hawng a.  Mizoram Kailawn 2019 atan hian District hrang hrangah leh zirna inahte outreach programme neih mek zel a ni.