Lawngtlai District Bawrhsap Pi Shashanka Ala, IAS hma laknaa Lawngtlai District chhunga Project Nutrition Garden, “Kan Sikul, Kan Huan” kalpui tura Phase-I atana thlan sikul, anganwadi centre leh naupang enkawlna hmuna zirtirtu leh thawktute tan vawiin khan District chhung block hrang hrangah hemi project hnuaia hma lak dan tur inzirtirna (training) buatsaih a ni.

Lawngtlai RD Block huam chhunga mite tana Lawngtlai BNRGSK Hall-a training buatsaih chu Block Development Officer (BDO) Pu Lalremruata Sailo-in kaihruaiin, “Kan Sikul, Kan Huan” project-in a tum leh a pawimawhnate a sawi a. Hemi project kalpui dan tur leh hunbi tuk hrang hrang a tar lang bawk.

He project-in a tum ber chu bazar-a mi lei ngai lova sikul, anganwadi centre leh naupang enkawlna hmun te’n an mamawh thlai hrisel leh thianghlim an intodelh theih nana an sikul bula thlai hmun siamtir leh chumi kal tlanga naupangte’n an taksa mamawh khawp ei tur tha kum tluana an dawn theihna tur leh mahni intodelh tura hna thawh dan an thiam theih nana zirtir a ni a. Project bul tanna atan hian Lawngtlai District chhunga primary school 38, middle school 78, high school 35, anganwadi centre 59, child care institute 3 leh SSA residential hostel 1, a vaiin institution 214 thlan chhuah an ni a. DC kaihhruaina hnuaiah Education, Social Welfare, RD, Soil, Agriculture, Horticulture, KVK leh sikul zirtirtute leh naupangte thawh honain sikul huan hi siam a ni dawn a ni.

Phase-I hnuaia zirna in thlan chhuahte hian an sikul bulah square fit 100 vela zau thlai hmun tur an buatsaih ang a. Hei hi Work Education hnuaiah zirlai naupangte nen thawh tur a ni a, leilung sawngbawl chungchangah Soil department mi thiamte’n an pui ang a, thlai chi hi Horticulture department-in tumin, a chin dan leh enkawl dan chungchangah Agriculture department leh KVK lamte’n kaihhruaina an pe bawk dawn a ni.

He project bul tanna atan hian thlai chi 5 – antam, bean, behlawi, bawrhsaiabe leh tomato te chu thlan phawt niin, a chi pawh zirna in hrang hrangah an mamawh zat tur thawn chhuah vek tawh a ni a. A hawnna hi July ni 13, 2019 (inrinni) hian he’ng zirna in hrang hrangah hian officer hrang hrangte’n an hmanpui dawn a. A hawn ni hian thlai chi thlak/tuh theih nghal turin a hma lama a hmunhma lo buatsaih a, lei lo sawngbawl chu sikul hrang hrang hian work education hnuaiah lo thawk lawk vek tura tih an ni.

Vawiin training hi Block hrang hrang pali-ah BDO te kaihhruaiin buatsaih a ni a. Soil, Agriculture, Horticulture leh KVK lama mi thiamte’n lei sawngbawl dan, thlai chin dan, enkawl dan leh leitha siam dante powerpoint presentation hmangin an zirtir a, a taka tih chhina (practical) hun buatsaih a ni bawk.