2279/2023-2024

Champhai the 12th October, 2023 – Mizoram Assembly Election, 2023 a Champhai District a Sector Officer leh Sector Police Officers-te tan vawiin khan DC Conference Hall, Keifangtlang-ah training buatsaih a ni.

MLA Election, 2023 atan hian Champhai District chu Sector 12 ah then niin 23-Champhai North ah Sector pali (4), 24-Champhai South ah Sector pathum (3) leh 25-East Tuipui ah Sector panga (5) a awm a. Heng sector-ah te hian Sector Officer leh Sector Police Officer pakhat ve ve an duty dawn a ni.

Champhai DC & DEO Pu James Lalrinchhana chuan Sector Officer leh Sector Police Officer-te chu inthlan hlawhtlinna tura official pawimawh berte zing ami an nih thu leh ECI pawhin an mawhphurhna a rawn tih zau belh sawiin, anmahni sector chan theuh chu bel taka zirchiang a, felfai taka hmalak dan tur Sector Management Plan tha tak siam theuh turin a chah a. Sector Officer te chu election process chhungin Executive Magistrate power pek an nih tur thu pawh sawiin, hei hian an role a pawimawh zia a ti lang chiang hle a ni, a ti a. Inthlannaa role pawimawh tak chelh theih chu sawrkar official tana thil lawmawm leh service chhunga chhinchhiah tlak anih thu sawiin, rilru zangkhai leh phur taka thawk turin a sawm a ni.

Vawiin training-ah hian Champhai SDO(S), Pu Lalrinawma Khiangte, State Level Master Trainer chuan Sector Officer leh Sector Police Officers-te mawhphurhna hrang hrang leh an hriattur pawimawhte a zirtir a. Pu Moses Lalfakawma Tlau, SDC chuan EVM training a neihpui bawk a ni.

Champhai District-a Sector Officer leh Sector Police Officer-te hian an bial vawi khat theuh fang chhuak tawhin inthlan hma in vawi 3 an fang chhuak hman tur a ni a. Anmahni sector chan theuhah inthlan tluang leh felfai taka kalpui anih theihnan ruahmanna mumal tak – Sector Management Plan an siam tur a ni a. An bial chhungah VCP, beat constable leh sawrkar official awmte nen tangrualin an sector ah theuh hma an la tur a ni a. Polling station map leh voter tana facility awm te, inkalpawhna kawng dinhmun, mobile leh internet connectivity dinhmunte leh Model Code of Conduct bawhchhiatnate a awm em tih uluk takin an vil tur a ni.

Champhai District Final Electoral Roll, 2023 in a tarlan danin Champhai District ah Voter mi 57,180 an awm a, an zinga mi 27,880 te hi mipa niin, hmeichhe voter 29,300 an awm a. Polling Station hi a zavaiin 84 awmin, 23-Champhai North ah 30, 24-Champhai South ah 25 leh 25-East Tuipui ah 29 a awm a ni.