2598/2023-2024

Champhai the 2^nd November, 2023 - Mizoram Assembly Election, 2023 a Champhai District a Sector Officer leh Sector Police Officers-te tan vawiin khan DC Conference Hall, Keifangtlang-ah training hnuhnung ber buatsaih a ni.

Champhai DC&DEO Pu James Lalrinchhana chuan District hmun hrang hranga Polling Station inspection a neihna ah te Sector Officer-ten an bial an vil uluk thu leh inpuahchahna tha tak an nei tih a hmuh thu sawiin, inthlan hlawhtling tak neih anih theihnan theihtawp chhuah tlang chhunzawm turin a chah a. Sector Officer te chu a bik takin Vote thlak Ni ah rilru fim tak leh chiai miahlova an hnahtawh a pawimawh takzet thu sawiin, a tul apiangah Election Office be pawp vat turin a chah bawk a ni.

Vawiin training-ah hian Champhai SDO(S), Pu Lalrinawma Khiangte, State Level Master Trainer chuan Sector Officer leh Sector Police Officers-te mawhphurhna hrang hrang leh an hriattur pawimawhte a zirtir a. Inthlan hma ni (Poll Eve) a tih ngei ngei ngai te, Poll Day a thil ken ngai te leh Report pek dan tur te zirho a ni.

MLA Election, 2023 atan hian Champhai District ah ruahmanna felfai tak siam a ni a. District pum chu Sector 12 ah then niin 23-Champhai North ah Sector pali (4), 24-Champhai South ah Sector pathum (3) leh 25-East Tuipui ah Sector panga (5) a awm a. Heng sector-ah te hian Sector Officer leh Sector Police Officer pakhat ve ve duty in, Anmahni sector chan theuhah inthlan tluang leh felfai taka kalpui anih theihnan ruahmanna mumal tak – Sector Management Plan an siam fel tawh a. An bial chhungah VCP, beat constable leh sawrkar official awmte nen tangrualin an sector ah theuh hma la in, Polling station map leh voter tana facility awm te, inkalpawhna kawng dinhmun, mobile leh internet connectivity dinhmunte leh Model Code of Conduct bawhchhiatnate a awm em tih uluk takin an vil mek a. Polling Station panna kawng tha tawklo te chu PWD in repair hna thawk chho mek zelin, Champhai District huamchhungah mobile signal awm miahlohna hmun shadow area a awmlo a ni.