2599/2023-2024

2023 Sahmulphah thla ni 2: Mizoram Legislative Assembly Inthlanpui, 2023-a Kolasib District chhunga assembly bial pathuma inthlan nana Electronic Voting Machine (EVM) leh Voter Verifiable Paper Audit Trail (VVPAT) hman tura ruahman fel sa baka thlaveng (reserve) atana EVM leh VVPAT mamawh tur belhna (supplementary) chu vawiin khan I&PR Conference Hall, Kolasib-ah first level checking, randomisation leh commissioning te tiin, hman theih tura buatsaih fel a ni.

He hunah hian FLC hmanga endik ngai VVPAT 5 chu endik hmasak a ni a. FLC endikna pal tlang tawh EVM control unit 22, ballot unit 19 leh VVPAT 11 te chu a hmanna tur leh inkawp tur thliar fel nan 1st randomisation leh 2nd randomisation tih zui niin, thliar fel tawh sa chu EVM engineer-te'n hman theih turin an buatsaih zui nghal a. A khawl lam buatsaih fel vek a nih hnuah candidate-te hming chhut luh niin, a kal dik leh dik loh enfiah leh vek phawt a ni a. Vote thlak nana hman theih mai tura peih felfai a nih hnuah khawih danglam theih tawh loh tura seal hmanga uluk taka char niin, dah ṭhat nghal zel a ni.

EVM leh VVPAT endik, thliar fel leh buatsaih felnaah hian Kolasib District chhunga assembly bial pathuma Returning Officer-te, Election Officer leh Assistant Returning Officer-te bakah, political party tin ai awhte an tel a. EVM leh VVPAT belhna (supplementary)-te hi bial hrang hranga mamawh thulha hman tur thlaveng (reserve) atana tih a ni.

Kumin Inthlanpui atan hian 4-Tuirial (ST) Assembly Constituency-ah EVM/VVPAT set 26, 5-Kolasib (ST) Assembly Constituency-ah EVM/VVPAT set 29 leh 6-Serlui (ST) Assembly Constituency-ah EVM/VVPAT set 34 hman a ni dawn a. EVM leh VVPAT hman tur bakah thlaveng (reserve) tur eng emaw zat chu buatsaih fel a, dah hran vek tawh a ni a. Eng emaw thulha harsatna a awm loh nan reserve tur hi ruahman belh leh a ni.