4354/2025-2026

Champhai, dated 9th February 2026: Vawiin khan National Disaster Management Authority (NDMA) kaihhruaina hnuaia Multi State Mock Exercise chu Champhai District-ah Kolasib leh Mamit District rualin neih a ni.

Mock drill hi lirnghing thlen thulha chetlak dan inzirna leh enchhinna niin lirnghing hi North East India-a thleng anga ngaih a ni a, Champhai District-ah pawh na taka thleng anga ngaih a ni. Chawhma dar 10:30-ah a thlen rualin siren a ri nghal a, District Disaster Management Authority (DDMA) kaihhruaina hnuaiah Circuit House-ah District Emergency Operation Centre (DEOC) din nghal a ni a. Hmun pali - CHANEM Building, District Hospital, District Education Office leh Vengsang Residential Area-ah chhiatna a thleng a, Champhai Bawrhsap leh Responsible Officer ni bawk Pu Mohammad Aaquib chuan DEOC kaihruaiin ro an rel nghal a. Incident commander te, liaison officer te, staging area manager te, logistics section chief te ruat an ni a, MRP te, Assam Rifles te, BRTF te leh Fire & Emergency Services atang tein Search & Rescue Team (SAR) team din an ni a, hmun tinah thawnchhuah nghal an ni. Heng chhiatna hmunah hian chhanchhuah hna te, meialh tih mit te, ruang leh hliam tuar sawngbawl leh enkawl te leh thil tul dang te rang taka kalpui nghal a ni a, damdawi ina enkawl ngai te pawh hruai nghal an ni. Hmun tinah hian observer ruat an ni bawk a, observer te hian heng chetlak dan hrang hranga tha lai leh tha lo lai te an thlithlai a, report an ziak nghal bawk a ni. He mock drill pumpui thlithlai tur hian CISF Asst. Commandant Pu GK Pathak a lo tel bawk a ni.

Mock drill zawh hian DEOC-ah debriefing neih a ni a, state level-a thlithlaitu leh district dang nen mock drill chungchang sawiho a ni bawk.