2937/2025-2026

Champhai, dated 15th January 2026: Vawiin khan Mizoram district dang rualin Champhaiah mock drill zingah neih a nih hnuah tlai khan Chhur Hmun, Bethel Vengah neih a ni.

Mock drill hi chhiatrupna thlen thulha chetlak dan tur inzirna a ni a, tun tum hian lirnghing tlai dar 4:45-ah thlen tir a ni. Lirnghing a thlen hian siren tihrik nghal niin District Emergency Operation Centre (DEOC) Circuit House-ah an thukhawm nghal a. Champhai Bawrhsap Pu Mohammad Aaquib chu Responsible Officer niin report a dawn ang te District Disaster Management Authority (DDMA) hnenah a sawi a, staging area chhawpchhuah niin staging area atang hian Search & Rescue team te, Medical team te an chanvo hrilh niin tirh chhuah nghal an ni. A hmunah hian mi 2 thiin mi 10 inhliam an awm a, team hrang hrangin chung chu buaipuiin a hmuna puih theih te an pui a, Hospital-ah te hruai an ni bawk.

Mock drill pumpui tana Incident Commander hi Addl. DC Pu James Lalnithanga a ni a, a hmunah hian P&E SDO Pu PC Lalrawnliana chu Incident Commander a ni a, PHE SDO Pu C. Zothansanga chu Observer a ni.

Mock drill hi tluang takin zawh a ni a, team hrang hrang pawn an chanvo tha takin an zo thei a. DEOC-ah tlai dar 6-ah debriefing neih a ni a, observer te, incident commander te leh team hrang hrangin an thil tih te, an thil hmuh te leh an ngaihdan - tha tawk lo leh hmasawn ngaihna te an sawi a ni. Bawrhsap leh DDMA Chairman Pu Mohammad Aaquib chuan chanvo nei zawng zawng te tha taka an tih tur an tih theih vangin lawmthu a sawi a, hmasawn ngaihna hrang hrang te tlaiah hmuh nghal ngei ni thei se a ti bawk. Tihtur chiang tawk lo te, tihtur leh hun bi hriatthiam loh te pawh mumal zawka inhrilh chiang turin a chah bawk a ni.

District level debriefing zawh hian tlai dar 6:45-ah State Level Debriefing video conference hmangin Champhai DDMA Member te an tel a ni.