National Disaster Management Authority (NDMA) ruahmannain  tun thla April Ni 26 hian a ruala lirnghing avanga chhiatrupna thlen palh thuta chet lak dan tur Multi State Mock Exercise on Eartquake chu Mizoram, Manipur, Tripura leh Nagaland-ah te neih a ni dawn a. Hemi atana inpuahchahna leh sawihona   DC Conference Hall, Keifangtlangah, Pu Liansangzuala Chhakchhuak  Addl DC hovin neih a ni.

Meeting kaihruaitu Pu Liansangzuala Chhakchhuak chuan Mizoram chu lirnghing thlen thut theihna hmun Seismic Zone V a awm anih avangin fimkhur angaih thu a sawi a. Khuarel chhiatna  thenkhatte chu dan theih loh ni mahse, chhiatna avanga harsatna thleng thei tam tak chu lo inven lawk a, chhiatna tam zawk pumpelh theih a ni, a ti a. Hetiang laka lo in ven dan zirlawkna Mock Drill neih a ni tur chu lawmawm a tih thu sawiin, Mock Drill neih tur chu tih tak zeta kalpui a tul a ni, a ti a. Hlawhtling taka mock drill neih anih theihna turin Mipuite tawiawmna a ngena, department tinte tihtur chanvo bitukte tha taka hlenchhuak turin a chah nghal a ni.  

Vawiin meeting  hian ni 26 April-a Champhai khawpui chhunga Mega Mock Drill neihna hmun tur atan DRDA Office, Bethel Mission School, Tourist Lodge, Market Area leh Dawrkai Kawn area-te chu a ruat a. Heng hmunah te hian District Disaster Mangement Authority lam aiawh ten  April Ni 23 hian kalchilhin thil tih dan tur sawifiahna briefing an nei dawn a ni.  Meeting chuan Staging Area atan CHANEM Building Tualzawl, Vengthlang a ruat a, District Emergency Operation Centre (DEOC) atan I&PR Conference Hall, CHANEM Building chu a ruat bawk a ni.

He hunah hian Pu PC Zoramthara, District Disaster Management Co-ordinator  DM&R Champhai chuan Powerpoint presentation hmangin he lem channa a inpuahchah dan leh a kalpui dan tur ruahmanna siam  sawifiahna hun a hmang a. Mock Drill neihna hi Central Observer-in a rawn hmanpui tura beisei a ni a. Mock Drill-ah hian  State Disaster Response Force (SDRF), Adventure Club-te pawh an tel dawn bawk a ni.   

He chhiatrupna lo thlen thuta chetlakna tur lem channa Mock Drill-ah hian mawhphurhna hrang hrang leh chanvote Department hrang hrangte in siam nghal a ni bawk. Meeting-ah hian Champhai District Disaster Management  Committee members-te an tel tha hle a ni.