Vawiin khan Champhai Kahrawt YMA Hall-ah Mizofed Champhai buatsaihin Ujjawala Diwas Pradan Mantri LPG Panchayat, mirethei zawk AAY leh BPL chhungkua ST/SC miten Gas Connection a thlawna an neih theih dan tur inhrilhhriatna neih a ni a. He hun hi Champhai Addl DC Pu Liansangzuala Chhakchhuak chuan khuallian niin a hmanpui.

Pu Lalrindika, Manager MIZOFED Champhai kaihruai programme-ah hian khuallian Pu Liansangzuala Chhakchhuak, Addl DC Champhai chuan Pradhan Mantri Ujjwala Yojana (PMUY) programme chu Central sawkarin phut let nei miahloa a siam Scheme anih avangin a țangkai thei ang bera chhawr hi kan mawhphurhna a ni, a ti a. PMUY chu sawrkar laipuia Ministry of Petroleum & Natural Gas kalpui niin Mizoramah chuan May ni 1, 2016 atanga bul tan anih thu a sawi a. Mirethei zawkten leirem an rah a, hriselna leh hmasawnna an neih theihna tur atana duan scheme pawimawh tak a ni, a ti a. Chhungkaw tin ten Mei hmang lova eirawng an bawl theihna tur leh Meikhu awm lohna khuaa kan khawtlang siam hi a tum a ni, a ti bawk. Pu Liansangzuala Chhakchhuak chuan PMUY chu LPG Connetion nei lo te'n thing leh meihawl hmanga eirawng an bawl thin avanga hriselna lama harsatna leh ram ngaw tih chereu avanga nghawng thalo tak takte chu a tirem thei dawn a ni, a ti bawk.

Khuallian hian Champhaia a hmasa ber ni turin Pi Ankimi, North Khawbung hnenah a thlawnin Gas connection hi a pe nghal a ni.

He hunah hian Pu K Lalawmpuia MIZOFED Staff hnen atangin PMUY chungchang ngaithlak niin zawhna leh chhanna hun hman a ni bawk a. Pu Lalhlawhliana, Board of Director MIZOFED Champhai chuan lawmthu sawiin he hun hi a khar a ni

PMUY hi Chhungkua Gas connection la nei lote tan LPG Distribuition-te kal tlangin Form fill up leh online hmangte a dil theih a ni a. Ration Card, Voters ID, Bank Account, Tribal Certificate, Chhungkuaa kum 18 tling chinte Adhaar Card zawng zawng leh a diltu Passport size photo pahnih form-ah hian thil telin a dil theih a ni.