Chief Minister Pu Lal Thanhawla chuan vawiin khan Institute of Bioresources And Sustainable Development (IBSD) Mizoram chu Nursery Vengah a hawng. IBSD hi sawrkar laipuia Department of Technology, Ministry of Science and Technology hnuaia National Institute niin, a hmunpui ber chu Manipur a ni a. IBSD hian India hmarchhak state-te chu bioresources (nun khawchhuah nana thing leh mau leh nungcha atanga mihringin a hman tangkai) hmangin khawtlang nun leh ei leh bar tihhmasawn chu a thil tum niin, tunah hian Manipur-ah Centre pahnih a awm tawh a, Sikkim leh Meghalaya-ah Centre a awm tawh bawkin, Mizoram hi IBSD awmna state palina a ni.

Chief Minister chuan Institute of Bioresources And Sustainable Development chu Mizoram tan Institute tangkai tak a nih tur thu leh, state chhung leh pawn lama zirmiten an hman tangkai theih tur institute Mizorama din a ni ta chu lawmawm a tih thu a sawi a. IBSD hmalakna leh he Centre hmang tangkaia researcher-te thawh rah chu Mizoram mai nilovin ram pum tana hmasawnna thlen tu a nih tur thu a sawi. Chief Minister chuan Mizoram chu ‘Biodiversity hotspot’ a nih avangin heng a hausaknate hi zirchiang a, hmang tangkaia state hmasawnna atan ngaihtuah a tul thu a sawi a. Ramhmul damdawi hrang hrangte zirchian a nih theih nan Regional Research Institute din a nih theih nan ruahmanna siam a nih thu te a sawi bawk.

IBSD Director Prof. Dinabandhu Sahoo chuan thu sawi bawkin, IBSD Mizoram chuan awmze nei leh thiam taka bio-resources te tangkai zawka hman dan tur ngaihtuahin, chu chuan midang tan hna siamin state ei leh bar tihhmasawnna te a thlen tur thu leh, chumi atan chuan state department hrang hrang leh national institute leh university-te chu inthlunzawm a thawhhona neih a pawimawh thu a sawi a. IBSD Mizoram chuan a bultan nan Mizoramin a thar thlai thenkhat – French Bean, Hamrcha leh mai ban te hlawk zawka thar a nih theih dan tur zirchian a, farmer training neihpui te leh market zawn pui te a tel thu a sawi. IBSD chuan India hmarchhakah Cherry Blossom/ Tlaizawng tilarin, India rama Cherry Blossom Festival hmasa ber pawh kum 2016 a neih a lo nih awh thu te, Mizoramah pawh Cherry Blossom Avenue siam a lo nih tawh thu te a tarlang bawk.

IBSD Mizoram-ah hian  Molecular Laboratory, Microscopy Laboratory, Bioinformatics Laboratory leh Plant Tissue Culture Laboratory bakah a tlawhtu researcher te an innghahna tur lodging engemawzah a awm a ni. 

Vawiin a hawnna inkhawmah hian MZU Vice Chancellor Prof. K.R.S. Sambasiva Rao leh professor dangte bakah Nursery Veng khawtlang hruaitute leh sawm bikte an tel a ni. IBSD Building hi Nursery Veng Pu P. Lalthangzauva Building, Economics & Statistics Directorate awmna thin kha a ni.