Governor Lt. Gen. Nirbhay Sharma PVSM, UYSM, AVSM, VSM (Retd.) chuan Dr. Michael Feiner, Consul General of the Federal Republic of Germany chu a chenna Raj Bhavan-ah inkawmna a neihpui a ni.

Lt. Gen. Nirbhay Sharma chuan Mizoram hmel hun reilote chhunga a danglam nasat thu leh hma a sawn chak thu te a sawi a. Tourism, horticulture leh food processing-ah hmasawnna tur tam tak a awm thu sawiin, Mizoram chu a ngaihna hria te tan remchanna leina ram (land of opportunities) a nih thu a sawi a ni. Mizo thalaite lehkha an thiam in, thiam thil an nei tha a ti a. Mizoram Governor chuan sumdawnglian te chu Mizoramah rawn kal hmasain eng lam hawi zawnga investment siam tur nge rawn enfiah se a tih thin thu a sawi a ni. Project hrang hrangah German sawrkar leh mimal kaltlanga thawhhona tha an neih a duh thu a sawi bawk a ni.

Dr. Michael Feiner chuan tunhnaiah sawrkar laipui chuan North East tihmasawn turin hma nasa taka a la nia a hriat thu a sawi a. Chu hmalakna chu Mizoram tan thenawm ramte mai nilo khawvel ramdang thleng pawha inphochhuahna remchanga hmang tura duh thu a sawi a ni. Mizoram leilung awm dan chu tourism atana a that thu sawiin, mipui pawhin rilru inhawng taka, a danglam biknate zuar thiam tura a duh thu a sawi a ni. Mizoram rawn tlawh that leh a, fan kual a tum thu a sawi bawk a ni.