131/2022-2023
Champhai, the 12th April, 2022: Naupang kum 1 atanga 19 inkarten rulhut an pai lohna tura rulhuthlo pek beihpui leh rulhutin a nghawng thalote inhrilhhriatna hun National Deworming Day (NDD), April ni 22 atanga ni 27, 2022 thlenga hman dan tur chungchang ngaihtuahtu Champhai District Level Coordination Committe on National Deworming Day (NDD) chu District Bawrhsap Pu James Lalrinchhana kaihruaiin vawiin chawhma dar 11 khan DC Conference Hall-ah thukhawm.

Thukhawm chuan National Deworming Day 2022 khuhhawnna hun chu April ni 22 hian Roseland School Champhaiah Deputy Commissioner hova hman nise tih a ni a. Hemi ni atang hian rulhuthlo ei runpui tan nghal ni se, ei tura tinzawn ten an ei vek theih nan leh tihhmaih an awm loh nan thual nawnna Mop up Day April ni 27 hian hman ni se tih a ni bawk.

NDD Coordination Committee thukhawm chuan rulhuthlo Albendazole tablet chu Sub-Centre atangin a hlawmin Sikul, Anganwadi leh College-ah te sem chhuah ni se, naupang leh zirlaite hnenah thawktuten ei dan tur bithliah angin eitir se, Anganwadi, Sikul leh College-a inziaklut lo te chu ASHA ten an inah kalchilhin pe mai se, pek dan report kimchang bialtu Sub-Centre-ah theuh thehluh vek ni se tih a ni bawk.

He hunah hian rulhut damdawi ei avanga harsatna awm theite laka hmalak dan turte pawh sawiho niin, CMO kaihhruai Adverse Event Management Team ruat nghal a ni a. Heng bakah hian Line Department hrang hrangte hmalakna tur sawiho a ni bawk.

NDD Coordination Committee-ah hian Line Department hrang hrang H&FW, DRDA, Education Department, Social Welfare Department, PHED leh DIET atanga committee member-te an tel ani.