132/2022-2023
Aizawl the 12th April, 2022: Chief Minister Pu Zoramthanga chuan vawiin khan Govt. Zirtiri Residential Science College building thar hawnna leh NAAC Grade 'A' Accreditation lawmna inkhawm, GZRSC Durtlang campus a buatsaih chu khuallian niin a hmanpui. Higher & Technical Education Minister Dr. R. Lalthangliana chu he hunah hian khualzahawm a ni.

Chief Minister chuan Govt. Zirtiri Residential Science College chu building thar tha tak an neih avang leh NAAC Accreditation grade 'A' an hmuh avangin a lawmpui thu a sawi a. Khawpuiah college engemawzat awmin, tam tak chu hmunhma rem lo tak tak a awm chu veiawm a tih thu a sawi a. Zirna in sangte hmasawn leh an lo changtlun zelna tur sawrkar pawhin tih tak zeta a ngaihtuah thu a sawi a. GZRSC chuan hmun hma tha tak inzarpharhna a nei chu a lawmpui thu a sawi. Chief Minister chuan khawvel hmasawnna kal chak tak karah hian hmathlir tha tak neih a pawimawh thu a sawi a. Vawiina tha leh pawimawh a kan hriatte hi kum sawm hnu lamah chuan a danglam vek thei tih hriain, kan thiamna leh theihna te hi a hun mil zela tangkaia kan hman thiam theih nan hmathlir tha tak neih thiam a pawimawh thu a sawi. Chief Minister chuan Mizoramin resource tha a neih te hman tangkai thiam pawimawh a tih thu a sawi a. College zirlaite chu an thiamna hmang tangkai tura fuihin, hlawhtling tur chuan tumruhna a pawimawh tih hre reng turin a chah a ni.

Khualzahawm Minister Dr. R. Lalthangliana chuan GZRSC chu NAAC Accreditation ah Grade tha tak an hmu chu a lawmpui thu sawiin, thawhhona tha tak zar nia a hriat thu a sawi a. Hemi ah hian duhtawk mai lova, kum 2027 a assessment an hmachhawn leh turah tuna Grade 'A' an hmuh aia sang hmuh tum turin a fuih a ni. Mizorama hmeichhe college hmasa ber a nihna te, tunah science college tha tak a nihna te chu GZRSC chu "bik" nihna a neihna a ni, tiin he college in hlawhtlinna hrang hrang a hmuhte chu a lawmpui thu a sawi a. Higher & Technical Minister chuan Mizoramah zirna quality tha kan mamawh thu sawiin, sawrkar pawhin zirna a ngaihpawimawh thu a sawi a. Zirna in sang tam zawk din a, a awm sate thuam that chu sawrkarin a theih chin chinah tih zel a tum chu a sawi a ni. Minister chuan Mizoram zirlaite chu hnam dang zirlaite aia thleng sang thei lo bik an nih loh thu a sawi a. Chutihrual chuan zirlai leh zirtirtute pawh tih tak takna nen zirna kalpui a, zirlaite chu certificate holder satliah ni lova chhawrtlak thiamna pawchhuak turin a chah a. An thiamna Mizo mipuiin an mamawh thu a sawi bawk.

Vawiina GZRSC Durtlang campus building thar Chief Minister in a hawn tak hian Academic & Administrative Building block (block-2) te, Academic building block (Block-3) bakah car parking leh canteen te a huam tel a. Building sakna hi sum hnar hrang hrang - DoNER, RUSA leh state sawrkar atang te a hmuh a ni a. Thawktute thawhkhawm, a vaiin cheng nuai 19 hmanga sak a awm bawk. Block-2 sak nan hian cheng nuai 650 hman niin chhawng li (room 24) a awm a. Block-3 hi cheng nuai 194 a sak niin RUSA 2.0 atanga sum hmuh cheng nuai 180 hmanga chhawng hnih (room 5 awmna) sak a nih bakah faculty-te sum thawhkhawm cheng nuai 14 hmangin basement floor pali siam a ni bawk. Car parking leh canteen te hi cheng nuai 12 leh nuai 5 (faculty contribution) a sak niin, chhawng hnih ve ve a awm a ni. Heng bakah hian he college ah hian library building, girls hostel leh boys hostel bakah home science building a awm bawk.

Vawiin inkhawm hi Pi Esther Lal Ruatkimi, Commissioner & Secretary, Hr. & Technical Education chuan kaihruaiin, Prof. B. Zoliana, GZRSC Princiapal chuan kalkhawmte lawmna thu a sawi bawk a. Dr. R. Lalengmawia, Vice-Principal hnen atangin building thar chungchang technical report ngaihthlak niin, Pi Lalrinsangi Nghinglova, Coordinator, IQAC chuan NAAC achievement report a pe bawk. Peer Team Visit hi March ni 22 leh ni 23, 2022 chhung khan neih niin, final institutional grade 3.09 pek a ni. Pu Remlalsiama, NAAC Celebration Committee Chairman chuan lawmthu sawiin hun a khar a ni.