1385/2023-2024

Champhai, the 4th August, 2023: Naupang kum 1 atanga 19 inkarten rulhut an pai lohna tura rulhut hlo pek beihpui leh rulhutin a nghawng thalote inhrilhhriatna hun, National Deworming Day (NDD), 2023 thawhhnihna August ni 10-17, 2023 chhunga hman tur chungchang ngaihtuahin Champhai District Level Coordination Committe on National Deworming Day (NDD) chu an Chairman Pu James Lalrinchhana, District Bawrhsap kaihruaiin vawiin chawhma dar 11 khan DC Conference Hall-ah an thukhawm.

District Bawrhsap Pu James Lalrinchhana chuan rulhut hlo ei beihpui thlakna National Deworming Day chu District mipuite hriselna atana hun pawimawh tak anih thu sawiin National Deworming Day (NDD), 2023 thawhhnihna neih turah hian Albendazole tablet dawng tura Sawrkarin a bituk chin ten an ei vek theihnan Line Department-te chu tangruala theihtawp chhuah tlang turin a ngen a ni.

Champhai CMO Dr PC Lalhmingliana chuan NDD kalpui tura inpuahchahna kal mek leh February thla a NDD 2023 thawh khatna chungchang report a pe a. National Deworming Day (NDD), 2023 thawhkhatna February ni 10-17, 2023 chhunga hman ah khan rulhut hlo Albendazole tablet naupang 51,544 hnenah pek niin target atangin 97.97% pek an ni.

Thutkhawm chuan National Deworming Day 2023 thawhhnihna kalpui tur khuhhawnna hun chu August ni 10, 2023 hian GM Higher Secondary School-ah hman nise a ti a, hun hman dan tur chu CMO Office in lo duang se tih a ni a. Hemi ni atang hian rulhut hlo ei runpui tan nghal ni se, ei tura tinzawn ten an ei vek theih nan leh hmaih an awm loh nan thualnawnna mop up day chu August ni 17, 2023 hian neih ni se an ti bawk.

NDD Coordination Committee thukhawm chuan rulhut hlo Albendazole tablet chu Health & Wellness Centre/Health Sub-Centre atangin a hlawmin zirna in leh Anganwadi-ah te sem chhuah ni se, naupang leh zirlaite hnenah thawktuten ei dan tur bithliah angin eitir se, zirna in leh Anganwadi-a inziaklut lote chu ASHA ten an inah kal chilhin pe mai se tih a ni bawk.

NDD Coordination Committee thutkhawmah hian Line Department hrang hrang: H&FW, Rural Development, School Education, Social Welfare, I&PR leh PHE Department atanga committee member-te an tel a ni.