3515/2022-2023
Champhai, the 8th February, 2023: Naupang kum 1 atanga 19 inkarten rulhut an pai lohna tura rulhut hlo pek beihpui leh rulhutin a nghawng thalote inhrilhhriatna hun, National Deworming Day (NDD), 2023 thawhkhatna February ni 10-17, 2023 chhunga hman tur chungchang ngaihtuahin Champhai District Level Coordination Committe on National Deworming Day (NDD) chu an Chairman Pu James Lalrinchhana, District Bawrhsap kaihruaiin vawiin chawhma dar 11 khan DC Conference Hall-ah an thukhawm.

District Bawrhsap Pu James Lalrinchhana chuan rulhut hlo ei beihpui thlakna National Deworming Week chu kum tin vawi hnih neih thin anih thu sawiin, Sawrkar program hrang hrangte inkungkaih leh kalkawp tlat an nih avangin hmaih bik nei lova ngaihpawimawh tlan a tul thu a sawi bawk.

CMO Champhai Dr. R. Lianmawia chuan India ram thingtlanga naupang tam takin thisen tlakchhamna an neih avang leh, thisen tlakchhamna awm tir theitu zinga pakhat rulhut beih let anih theih nan Sawrkar laipuiin Rulhut hlo do beihpui thlakna, National Deworming Week a kalpui thu a tarlang bawk.

Thukhawm chuan National Deworming Day 2023 thawhkhatna kalpui tur khuhhawnna hun chu February ni 10, 2023 hian Govt. Venglai Comprehensive Middle School-ah chawhma dar 10:30 hian Bawrhsap hova hman nise a ti a, hun hman dan turte duan nghal a ni a. Hemi ni atang hian rulhut hlo ei runpui tan nghal ni se, ei tura tinzawn ten an ei vek theih nan leh hmaih an awm loh nan thualnawnna mop up day chu February ni 17, 2023 hian neih ni se an ti bawk.

NDD Coordination Committee thukhawm chuan rulhut hlo Albendazole tablet chu Health & Wellness Centre/Health Sub-Centre atangin a hlawmin zirna in leh Anganwadi-ahte sem chhuah ni se, naupang leh zirlaite hnenah thawktuten ei dan tur bithliah angin eitir se, zirna in leh Anganwadi-a inziaklut lote chu ASHA ten an inah kalchilhin pe mai se, pek dan report kimchang bialtu Health & Wellness Centre/Health Sub-Centre-ah theuh thehluh vek ni se tih a ni bawk.

He hunah hian rulhut damdawi ei avanga harsatna awm theite laka hmalak dan turte pawh sawiho niin, CMO kaihhruai Adverse Event Management Team din nghal a ni a. National Deworming Week pual inzirtirna zau zawk media hrang hrang leh line department kaltlanga neih nise tih a ni a. Heng bakah hian Line Department hrang hrangte hmalakna tur sawiho a ni bawk.

He hunah hian Ministry of Health &Family Welfare leh Ministry of Human Resources Development tangkawp buatsaiha, Pre-primary atanga Higher Secondary School zirlaite taksa leh rilru hriselna kawnga hmalakna, School Health & Wellness Programme (Ayushman Bharat) chungchang Pi K.Lalengliani, Rashtriya Kishor Swasthya Karyakram (RKSK) Co-ordinator, National Health Mission (NHM) hnen atangin ngaihthlak a ni.

School Health & Wellness Programme (Ayushman Bharat) Scheme hnuaiah hian a bultan nan CMO Champhai huamchhunga Middle School, High School leh Higher Secondary School 141 a zirtirtu 268 te Health & Wellness Ambassador tura training pek niin, training material-te pek fel an ni a, class tinah anmahni thlawptu tur Health & Wellness Messenger 2 zel an ruat leh dawn a ni. Ambassador-te hi module 11 ahte zirtirna pek niin, hengte hi zirlai curriculum-a telh tura beisei niin, kar khatah class vawi hnih tal nei thei tura beisei a ni.

NDD Coordination Committee thutkhawmah hian Line Department hrang hrang: H&FW, Rural Development, School Education, Social Welfare, I&PR leh PHE Department atanga committee member-te an tel a ni.