3514/2022-2023
Aizawl, the 8th February 2022: Mizoram State Commission for Protection of Child Rights (MSCPCR) chuan School kum tawp exam a lo hun leh dawn tak avangin School naupangten exam nuam ti tak leh hrehawm ti lova an hmachhawn theihna turin a hnuaia tarlan ang hian thuchhuah a siam.
School naupangten exam nuam ti tak leh hrehawm ti lova an hmachhawn theihna atana thuchah.
School kum tawp exam a lo hun leh dawn hnai ta a. School, zirtirtu, zirlaite leh, nu leh pate pawn theihtawp chhuahin hma kan la chho mek hlawm a ni. He hunah hian Mizoram State Commission for Protection of Child Rights (MSCPCR) chuan zirlai ten tha taka an zirlai te an zir a, tluang taka exam an hmachhawn theih nan leh, hlawhtlinna an chan ngei theih nan duhsakna a hlan a ni.
Exam emaw test emaw kan hmachhawn dawn reng reng hian, mihring hian zam rukna kan nei thin a, hei hi inpuahchahna tha nei tura min turtu a ni ve thin reng bawk ani. Amaherawhchu, he zamna/hlauhthawnna (nervousness/anxiety) hi a nasat lutuk emaw, belhchhahtu boruak tha lo dang engemaw a awm erawh chuan kan inbuatsaihna a ti buaiin, kan exam/test performance a ti chhe vek thei thung a. Chu mai ni lovin, a aia pawi zawk, lehkha zir kawnga ti thuanthu hlen tu leh, mihring hriselna leh nunna hial tana thil pawi a thlen thei ani.
Chuvangin, zirtirtute leh nu leh paten, kan faten an zirlai te thlamuang tak leh bawhbuaitu nei lova an zir theih nan ruahmanna fel tak siamin, hun leh hmun nuam kan siamsak thiam hi a pawimawh em em ani. An zirlai atana an inbuatsaihna ti buai thei leh an rilru ti hnual thei thil an tawn loh hi a pawimawh em em a. In leh School ah boruak zangkhai leh hlimawm lam chhawpchhuah sak tum hram hram ila, harsatna an neih leh neih loh te zawt thin ila, an thusawi hrim hrim te ngaihthlak sak a, ngaih pawimawh sak hram hram te a pawimawh em em ani.
MSCPCR chuan, School thuneitute chu, zirlai nu leh pa te nen inremsiamna felfai tak an nei a nih loh chuan, zirlaite hmasawn zelna (development) tur atana harsatna thlen thei thil tuk luih leh phut luih siam lo turin a duh a. Zirlai naupangte hian dikna chanvo - "Right to Development', an neih ang ngeiin, exam/test hmachhawn hi an chanvo ve reng a ni si a.
Naupangin a zirna kawngah harsatna a tawk a nih chuan, Mizoram State Commission for Protection of Child Rights (MSCPCR) - RTE Helpline Number: +91 60098 88804 ah hian phone call/SMS/WhatsApp hmangin a biak pawh theih reng bawk a ni.
