3513/2022-2023

Khawzawl, the 7th February, 2023 : Vawiin khan Khawzawl District-ah Kangmei ven hapna, Fire Prevention Week hawnna neih a ni a, Khawzawl Electric Veng YMA Hall-ah Fire Prevention Week hi khuallian SDO Sadar Pu James Lalnithanga'n a hawng a ni.

Khawzawl Joint VC Chairman Pu K. Vanlalsiama kaihhruaia Fire Prevention Week hawnna inkhawm buatsaihah khuallian Pu James Lalnithanga chuan kangmei vangin kumtin thing leh mau, nungcha leh in leh lo tamtak kan chan thin tih sawiin kuminah chuan hetiang hi kan District-ah a thlen lohna turin mipuite kan fimkhur a tul tih a sawi a. Kangmei ven hapna kan hman turah hian mipuite kangmei tichhuak lo tura fimkhur a ngaihzia kan hriat thar a duh tih a sawi. SDO Sadar chuan kangmei chhuak a awm reng rengin District Administration emaw Police emaw, NGO hruaitute emaw phone hmanga hrilh nghal zel a tul thu sawiin, DC Office-ah Quick Response Team an awm a, kangmei chhuah thulhah che chhuak nghal thei tura ruahman an ni tih a sawi bawk.

Vawiina Kangmei Ven Hapta hawnnaah hian Honorary Wildlife Warden Pu PC Rosiama leh Sub-Hqrs. YMA Vice President Pu Lalhmingliana Chhangte ten thu an sawi bakah P&E Department aiawhin SDO Pu V. Lalzamvela leh EF&CC Department aiawhin Forest Guard Pu Joseph Lalnunmawia ten PowerPoint Presentation hmangin Awareness Campaign an nei a. Khawzawl Wildlife Division DFO Pi Lawmnapari kaihhruaiin Fire Prevention Week puala Govt. Khawzawl College Painting Competition buatsaih a lawmman dawngtute hnenah lawmman sem a ni bawk.

Vawiina hun hmanah hian Khawzawl khawpui chhunga Village Council 10 aiawhte leh YMA Branch hrang hrang aiawhte bakah NGO hruaitute leh MJA aiawhte an tel a ni.