3726/2023-2024

8th February, 2024 : Vawiin Khan Naupang kum 1 atanga 19 inkarten rulhut an pai lohna tura rulhut hlo pek beihpui leh rulhutin a nghawng thalote inhrilhhriatna hun, National Deworming Day (NDD), 2024 thawhkhatna chungchang ngaihtuahin Champhai District Level Coordination Committe on National Deworming Day (NDD) chu Pu M. Misael Additional DC in kaihruaiin vawiin chawhma dar 10.00 am khan DC Conference Hall-ah an thukhawm.

Chairman Pu. M. Misael chuan rulhut hlo ei beihpui thlakna National Deworming Week chu kum tin vawi hnih neih thin anih thu sawiin, Sawrkar program hrang hrangte inkungkaih leh kalkawp tlat an nih avangin hmaih bik nei lova ngaihpawimawh tlan a tul thu a sawi bawk.

Pi C. Ramdinmawii Asst Director (F&D) Champhai chuan kum hmasa lama National Deworming Day hman dan te sawiin. Hmun hrang hrang ah naupang tam tak thisen tlachham an awm thin a, thisen tlakchhamna awm tir theitu zinga pakhat rulhut beih let anih theih nan Sawrkar laipuiin Rulhut hlo do beihpui thlakna, National Deworming Week a kalpui thu a tarlang bawk.

Thukhawm chuan National Deworming Day 2024 thawhkhatna hman hun chu February ni 9, 2024 hian Govt. Vengthlang Middle School-ah chawhma dar 11:00 ah Additional DC, Champhai hova hman nise a ti a, hun hman dan turte duan nghal a ni. Hemi ni atang hian rulhut hlo ei runpui tan nghal ni se, ei tur ten an ei vek theih nan leh hmaih an awm loh nan thualnawnna mop up day chu February ni 16, 2024 hian neih ni se an ti.

NDD Coordination Committee thukhawm chuan rulhut hlo Albendazole tablet chu Health & Wellness Centre/Health Sub-Centre atangin a hlawmin zirna in leh Anganwadi-ahte sem chhuah ni se, naupang leh zirlaite hnenah thawktuten ei dan tur bithliah angin eitir se, zirna in leh Anganwadi-a inziaklut lote chu ASHA ten an inah kalchilhin pe mai se, pek dan report kimchang bialtu Health & Wellness Centre/Health Sub-Centre-ah theuh thehluh vek ni se tih a ni bawk.

He hunah hian rulhut damdawi ei avanga harsatna awm theite laka hmalak dan turte pawh sawiho niin Deworming Week pual inzirtirna zau zawk media hrang hrang leh line department kaltlanga neih nise tih a ni a. Heng bakah hian Line Department hrang hrangte hmalakna tur sawiho a ni.

School Health & Wellness Programme (Ayushman Bharat) Scheme hnuaiah hian a bultan nan CMO Champhai huamchhunga Middle School, High School leh Higher Secondary School 147 a zirtirtu 325 te Health & Wellness Ambassador tura training pek niin, training hmanrua te pek fel an ni tawh a, class tinah anmahni puitu tur Health & Wellness Messenger 2 zel an ruat leh dawn a ni. Ambassador-te hi module 11 ahte zirtirna pek niin, hengte hi zirlai curriculum-a telh tura beisei niin, kar khatah class vawi hnih tal nei thei tura beisei a ni.

NDD Coordination Committee thutkhawmah hian Line Department hrang hrang: H&FW, Rural Development, School Education, I&PR leh PHE Department atanga committee member-te an tel a ni.