1424/2024-2025

Champhai, 2nd August, 2024: Vawiin Khan Naupang kum 1 atanga kum 19 inkar ten rulhut an pai lohna tura rulhut hlo pek beihpui leh rulhutin a nghawng thalote inhrilhhriatna hun, National Deworming Day (NDD), 2024 thawhhnihna chungchang ngaihtuahin Champhai District Level Coordination Committee on National Deworming Day (NDD) chu Pu VL Remliana, Champhai Bawrhsap kaihhruaiin DC Conference Hall-ah an thu khawm.

Vawiin thutkhawmah hian National Deworming Day 2024 thawhhnihna August ni 9-a hman dan tur chungchang sawi ho a ni a. NDD 2024 pual hian BC Lalthlamuana English Academy, Champhai Kahrawt Vengah hun hman ni se tiin ruahmanna siam a ni a, Pu VL Remliana Champhai Bawrhsap chu khuallian niin Deworming Day hi a hawng ang. Naupang ten rulhut hlo an ei vek theih nan leh hmaih an awm loh nan thualnawnna hun (Mop-up Day) August ni 19, 2024 hian neih a ni dawn bawk a ni.

Thutkhawmah hian Deworming Day hlawhtling taka neih a nih theih nan hian mipuite zirtirna local TV Channel - LCN leh CCN kaltlanga kalpui mek a ni tih tarlan a ni a. District chhunga naupang ten rulhut hlo an ei theuh theih nan hmalakna hi Health & Wellness Center, Primary Health Center leh Community Health Center te kaltlangin kalpui a ni ang. Damdawi eitu ten harsatna an tawh palh theih te veng turin Adverse Event Management Team din an ni a, hmalakna kalpui dan en zui turin Monitoring Team din an ni bawk.

He hunah hian National Deworming Day 2024 thawhkhatna thlirletna pawh neih a ni a. Champhai District (undivided) chhunga sawrkar sikul (Govt & Govt Aided) 332, private school 106 leh Anganwadi 288-ah te rulhut hlo do beihpui hi kalpui a ni a, hei bakah hian naupang sikul kal lo te pawh he hmalakna hnuaiah hian telh vek an ni. NDD thawhkhatnaah khan rulhut hlo ei thei kum 1-19 inkar mi 52,318 atangin mi 51,623 te hnenah damdawi (Albendazole) pek an ni a, hei hi za zela 98.67% a ni. National Deworming Day 2024 thawhhnihnaah hian naupang 52,609 te hnenah rulhut hlo pek tum a ni.

NDD Coordination Committee thutkhawmah hian Line Department hrang hrang: H&FW, Rural Development, W&CD, I&PR leh PHE Department atanga committee member-te an tel a ni.