1425/2024-2025

Dated Hnahthial, the 2nd August, 2024: Vawiin chawhnu khan South Tuipui Bialtu MLA Pu Jeje Lalpekhlua chuan Hnahthial chhim lama National Highway- 54 kawng tla bal chu a hmunah tlawhin thuneitute nen hmalak dan tur an en ho nghal a. MLA hi Hnahthial District Bawrhsap Pi Rita Lalnunmawii Pachuau, Addl DC, Pu Zothanmawia Khiangte, NHIDCL, ABCI, Mathyans Construction, kawng chhuat bal chhak ram neitu te, Sub Hqrs. YMA hruaitu, Sub Hqrs., YMA leh Vigilance Committee hruaituten an tawiawm a ni. Kawng chhe lai enfiah zawh hian bialtu MLA hian department hrang hrang officials-te a office-ah kawmna hun a nei nghal a ni.

Kawng chhiatna hmunah hian thil awm dan te thlir ho niin Hnahthial bypass kawng laitute chu an kawng enkawl lai chhe lutuk chu fur lai pawh ni se a theih ang anga thawm tha a, lirthei tang a awm palh pawh a tanpui nghal thei tura inring reng turin MLA Pu Jeje Lalpekhlua hian a hrilh a. NHIDCL lam pawhin kawng minna thlang lam-ah lei tawlh zel tur venna atan lungrem nghal an tum tih an hrilhin lung rem an zawh hma chuan emergency-a kal theih turin tuna kawng chhuat bal ko chhak lam hi laih nghal nise tiin thu an titlu ta a ni.

MLA Pu Jeje Lalpekhlua chuan helai kawng chhuat bal chhak lam laih a nih theihna atana ram neitu, Pu FB. Vanlalruata te chhungkaw inphalnaah lawmthu a sawiin lirthei lian tlan phal a nih loh thu Hnahthial Superintendent of Police in thu an chhuah chu lirthei khalhtu tin ten zawm theuh thei se a duh thu a sawi bawk a ni.

Hemi zawh hian bialtu MLA chuan a office-ah officers hrang hrang - District Fisheries Development Officer, District Horticulture Officer, District Civil Supplies officer leh District Sericulture Officer te chu hmuin an department tinte dinhmun, hmachhawp leh mamawh hrang hrangte chu a ngaithlaksak a. 

An hmachhawpte leh harsatna thlente chu a theih ang tawka lo sutkiang sak a tum thu sawiin department hotu tinte chu an hmalaknaah puih zel a in huam thu a hrilh nghal bawk a ni.