4146/2024-2025

Champhai, 10th February 2025: Naupang kum 1 atanga 19 inkar ten rulhut an pai lohna tura rulhut hlo pek beihpui leh rulhutin a nghawng thalote inzirtirna hun, National Deworming Day (NDD), 2025 thawhkhatna chu vawiin khan Govt. Vengthlang Middle School-ah Champhai Bawrhsap Pu VL Remliana chuan a hawng.

Champhai Bawrhsap Pu VL Remliana chuan he hunah hian thu sawiin, India sawrkar kalphung chu mipuite zalenna nekcheptu (Police State) ni lovin mipuite hmakhua ngai a ruahmanna siam ṭhin tu (Welfare State) a ni, a ti a. Sikul naupangte chu sawrkar ruahmanna te chhawr ṭangkai a, hmasawnna atana lo hmang zel turin a chah a ni.

Pu VL Remliana chuan hriselna a ṭhat loh chuan hlawhtlinna chan a har ṭhin a ni tiin, zirlaite chu an taksa uluk taka vawng a, hriselna ngaipawimawh turin a chah a. He mi kawngah hian zirlaite chu mithiam te thu sawi pawm thiam a, zawm tum ṭheuh turin a chah bawk a ni.

He hun hi Dr. PC Lalhmingliana, Sr. CMO, Champhai chuan kaihruaiin rulhut hlo do a pawimawh zia leh he mi kawnga sawrkar hmalakna hrang hrang te a tarlang a. Mihring hriselna kawng hrang hrang nghawng theitu anih angin rulhut do chu ngaihpawimawh a ṭul hle a ni, a ti.

National Deworming Day (NDD), 2025 thawhkhatna hi vawiin February ni 10 atangin February ni 17 thleng neih tur a ni a. Hemi hun chhung hian District chhunga zirna in hrang hrangah rulhut hlo (Albendazole) a huhovin ei a ni dawn a, zirna ina inziak lut lo te chu ASHA-ten an inah kal chilhin an pe dawn a, a ei tur ten an ei veka tumah hmaih an awm loh nan a thualnawnna (Mop Up Day) hi February ni 17, 2025-ah neih leh tur a ni. National Deworming Day thawhhnihna hi August thlaah neih leh tur a ni ang.