4147/2024-2025

Saitual, the 10th February, 2025: Tukin dar 7:00 AM khan District Level Committee on Fire Prevention (DLCFP), Saitual District buatsaihin Fire Prevention Week (Kangmei Ven Hapta) 2025 hawnna hun chu Saitual DC Bangla kawtah hman a ni a, DLCFP Chairman leh District Bawrhsap ni bawk, Dr. Lalngura Tlau chu khuallian niin hun a hmanpui.

He hunah hian khuallian Dr. Lalngura Tlau chuan kalkhawmte hnenah lawmthu a sawi a, ram changkang apiangin an ram ngaihhlut nachang an hria tih sawiin, Mizote pawhin a neitu rilru puin kan ramte chu humhalhin, kangmei laka kan venhim a tul a ni, a ti.  Bawrhsap chuan kangmei chu thunun a nih chuan thil tangkai tak a nih rualin, thunun loha a awm chuan thil hlauhawm tak leh chhiatna tam tak, thihna hial pawh thlen theitu a ni, a ti. Dr. Lalngura Tlau chuan Saitual District chu kangmei venhim kawngah an tangrual thin hle a ni tih sawiin, kangmei a chhuah apianga a sulsutu leh hma latu chu khawtlang hruaitute, YMA leh VC te an ni thin a ni, a ti a, khawtlang mipuite tanrualna a lang hle a ni tih a sawi bawk. Saitual District-a kangmei venhim kawngah Forest Department chu tan la thar lehzual turin Bawrhsap chuan a fuih a, sawrkar department hotute leh khawtlang hruaitute pawh tangrual a, kangmei venkim kawngah theih tawp chhuaha hma la zel turin a ngen nghal a ni.  

Kangmei Ven Hapta 2025 hawnna hi Pu PC Lianzuala, DLCFP Member Secretary chuan a kaihruai a, kum hmasa lama Saitual District-a kangmei chhuah dan report pein, District Level Committee on Fire Prevention, Saitual District-in a hmalak dan tur an rel hrang hrang te a tarlang nghal a ni. Pu PC Lianzuala kaihhruainain kalkhawmte chuan Fire Prevention Week 2025 thutiam (Pledge) an sawi rual bawk a ni.    

Kangmei Ven Hapta 2025 hi February ni 10 atanga ni 15 thleng neih tura ruahman a ni a, kangmei venhim kawnga hma la tha ber district leh khua chu lawmman pek an ni ang. Huan/ leipui tur mimal rama vat te chuan March ni 5 hmain an hal tur a ni a, khawtlang theh ram neitute chuan March ni 15 hmain an lo te chu an hal tur a ni.  Hmunphiah hmun neite chuan March 31 thleng an hal thei ang. Saitual District chhunga lo/ huan/ leipui hal tur reng rengin an hal hma ni thumah VC hnenah an hriattir tur a ni.

Vawiin inkhawm hi Pu PC Lianzuala, DLCFP Member Secretary chuan kai hruaiin, Pu Lalzarmawia, Principal, Govt. Saitual College chuan hunserh a hmang a, thusawi hi khuallian Dr. Lalngura Tlau bakah Sub Hqtr YMA, Saitual District atang leh MUP, Saitual District atang tea ngaihthlak niin, he hun hi Pu Jonathan Lalhruaitluanga, RO chuan lawmthu sawinain a khar a ni.  Vawiin hun hmannaah hian sawrkar department hotute, khawtlang hruaitute leh tlawmngai pawl aiawhte an tel a ni.