1508/2024-2025

Champhai, 9th August 2024: Vawiin khan naupang kum 1 atanga kum 19 inkar ten rulhut an pai lohna tura rulhut hlo pek beihpui leh rulhutin a nghawng thalote inhrilhhriatna hun, National Deworming Day (NDD), 2024 thawhhnihna chu Champhai Bawrhsap Pu VL Remliana’n BC Lalthlamuana English Academy, Kahrawt Vengah a hawng.

Khuallian Pu VL Remliana chuan zirlaite chu hlawhtlin tum theuh turin a fuih a, hlawhtlinna kawnga thil pawimawh tak chu hriselna a ni tiin, zirlaite chu an hriselna uluk taka vawng turin a chah. Sawrkarin mipuite hriselna a ngaihpawimawh avangin hmalakna hrang hrang a kalpui thin thin thu pawh Champhai Bawrhsap hian a sawi a, “Sawrkar hmalaknate mipuiin tha taka kan zawm a, thu kan awih a ngai a ni” a ti.

He hun hi Dr. PC Lalhmingliana, Sr. CMO chuan kaihruaiin, Dr. Vanzarliani, Dy. CMO chuan National Deworming Day hman anih chhan te a sawi fiah a. Rulhut chuan hrisel lohna hrang hrang a thlen theih avangin, naupang kum 1-19 ten rulhut hlo an ei vek theih nan sawrkarin ruahmanna a siam a ni, a ti. National Deworming Day Coordination Committee a Line Department – Public Health Engineering, Women & Child Development, School Education leh Rural Development aiawh te pawhin thu sawiin faina leh hriselna chungchang thupui hrang hrang zirlaite hnenah hian an hrilfiah a ni.

National Deworming Day 2024 thawhhnihnaah hian Champhai District chhunga sawrkar sikul 332, private school 106 leh Anganwadi 288-ah te rulhut hlo do beihpui hi kalpui a ni dawn a, hei bakah hian sikul kal tawh lo te tan pawh ruahmanna siam a ni. Vawiina rulhut hlo ei hman lo te tan August ni 16 khian thualnawnna (Mop-Up Day) neih leh tur a ni a, naupang 52,609 te hnenah rulhut hlo hi pek tum a ni.