1840/2022-2023
Champhai, the 7th September, 2022: National Health Mission (NHM) hnuaia programme, Rashtriya Kishor Swasthya Karyakram (RKSK) buatsaihin vawiin chawhma dar 10:30 khan I&PR Auditorium, CHANEM Building, Champhaiah tleirawl leh rawltharte tan chaw tha leh hrisel ei pawimawhna inzirtirna hapta, 'National Nutrition Week' September ni 1-7, 2022 chhunga kalpui mek pualin hun hman a ni a. Hemi hnu hian chaw tha leh hrisel ei pawimawhna inzirtirna kawngzawh, 'National Nutrition Week Rally' huaihawt a ni.

He hun kaihruaitu Dr. R.Lianmawia, CMO Champhai chuan National Nutrition Week puala hun hman chu rawlthar leh tleirawlte tana pawimawh tak, an thanlen chhoh zelna kawnga puitu tur a nih thu sawiin, hun hmang tura kalkhawmte lawmna thu a sawi a. Hrisel nan ei tur tha mai piah lamah taksa mamawh inchawih mawi tawk ang zela ei a tul thu sawiin, thil chi khat ei teuh lovin taksa mamawh eitur chi hrang hrangte kan ei thin tur a ni, a ti a. Kum 10-19 inkar adolescent hun chu taksa, rilru leh ngaihtuahna insiam danglam chhoh hunlai a nih thu sawiin, a lanchhuah dan hrang hrangte a sawifiah a. He tih hunlai hian taksa thang chho mek tana chaw tha nutrition; micronutrient, macronutrient, vitamin leh tul dangte mamawh ang zela ei a pawimawha, hmawmsawm mai mai ei chuan taksa mamawh tlakchhamna leh natna thlengin a thlen thei a ni, a ti bawk. Nutrition chungchang inhrilhhriatna hun tha tak buatsaih a ni chu lawmawm tiin, kalkhawmte chu an thil zir leh hmuhte midangte zirtir chhawng zel turin a chah bawk.

He hunah hian Pi K.Lalengliani, District Co-ordinator, RKSK hnen atangin eitur tha, hriselna leh faina chungchang zirtirna ngaihthlak a ni a. Zirtirna pek atangin quiz competition buatsaih niin, lawmman sem chhuah a ni a. Pi C.Lalramengi, District Programme Manager, NHM in zirlaite hnenah thisen siamtu leh tlakchham theihna atanga vengtu damdawi, Iron Folic Acid (IFA) mum eitur a sem chhuak a. Hemi hnu hian chawtha leh hrisel ei pawimawh zia inzirtirna kawngzawh 'National Nutrition Week Rally' chu Darthangvunga Traffic Point atanga Selluaia Traffic Point thlengin Pu Lalramzauva, DEIC Manager kaihhruaina hnuaiah neih a ni.

He hunah hian Dr. Vanzarliani, SMO; Dr. Lallawmkima, DIRPO; Zirtirtu leh Zirlaite an tel a ni.