1839/2022-2023

Khawzawl, the 6th September, 2022: State Election Commission ruahmannaa Khawzawl District chhunga VC By-Election Aiduzawl leh Sialhawk khuaa neihte chu boruak muanawm tak hnuaia tluang taka zawhfel niin, vote tlate chhiar zawhfel a ni.

Inthlanna hi Aiduzawlah District Election Officer Pu C.C. Lalchhuangkima, DC leh Sialhawkah Addl. DC Pu Lalvenhima ten tlawhin an enfiah a. Tukin dar 7 atang khan inthlanna hi neih tan niin, tlai dar 5 thleng hun hawn niin hun bituk chhungin vote thlak zawhfel hman a ni.

Aiduzawlah hian vote 139; mipa 71 leh hmeichhia 68 ten vote an thlak a, vote tla zat hi vote nei zawng zawng zat atanga chhuta za zela 63.76 (63.76%) a tling a ni. 
Aiduzawl VC By-Election Result:
1. Lalrualkima (INC) - 58 votes (41.73%)
2. Khawiliana (MNF) - 81 votes (58.27%)

Sialhawkah hian vote 1120; mipa 582 leh hmeichhia 538 ten vote an thlak a, vote tla zat hi vote nei zawng zawng zat atanga chhuta za zela 66.23 (66.23%) a tling a ni.
Sialhawk VC By-Election Result:
1. Laltlanchhuaha Ralte (INC) - 209 (18.66%)
2. R. Vanlalvuana (MNF) - 430 (38.39%)
3. R. Laldinpuia (ZPM) - 472 (42.12%)
Vote thi - 9 (0.80%)

August ni 8, 2022 a VC By-Election Final Electoral Roll tlangzarhin a tarlan dan chuan Sialhawk khuaah hian vote nei mi 1,691 an awm a; heng zinga 820 te hi mipa niin, 871 te chu hmeichhia an ni a. Aiduzawl-ah hian vote nei mi 209 an awm a; heng zinga 106 te hi mipa niin, 103 te chu hmeichhia an ni.

Sialhawkah hian VC seat 5; General seat 4 leh Reserved seat 1 a awm a. General seat atanga tling VC member 1 boral avangin he seat ruak hi hnawhkhah a ngai a. Aiduzawl khuaah hian VC seat 3; General seat 2 leh Reserved seat 1 a awm a, General seat atanga tling VC member 1 boral avangin a hnawhkhat turin inthlanna buatsaih a ni.