1838/2022-2023

Champhai, the 6th September, 2022: General Seat 1 hnawhkhat tura Champhai Dinthar Veng VC By-Election, State Election Commission ruahmannaa buatsaih chu boruak muanawm tak hnuaiah tluang taka zawhfel niin, vote tlate chhiar zawhfel a ni.

Inthlanna hi Polling Station 1, Govt. Kanan Middle School-ah buatsaih a ni a. Polling Station hi District Election Officer Pu James Lalrinchhana, Assistant District Election Officer Pu Lalnunfela Chawngthu ten tlawhin an enfiah a. Heng bakah hian Returning Officer Pu C.Lalthanpuia, Magistrate, Security Personnel leh Polling Official ten uluk takin an vil bawk a ni.

Tukin dar 7 atang khan inthlanna hi kalpui tan niin, tlai dar 5 thleng hun hawn niin hun bituk chhungin vote thlak zawhfel hman a ni a. Vote 488; mipa 173 leh hmeichhia 315 ten vote an thlak a, vote tla zat hi vote nei zawng zawng zat 652 atanga chhuta za zela 74.85 (74.85%) a tling a ni.

Dinthar VC by-election seat ruak 1 atan hian chuhtu hming pe lut mi 3; INC, MNF leh ZPM candidate-te an awm a. Vote thlak zawhfel hnu hian polling station-ah vek hian Polling Assistant 6 ten dawhkan 3 ah vote an chhiar chhunzawm nghal a. ZPM Candidate Pi T. Zakimi chuan vote 219, za zela 44.88 hmuin tlingah puan a ni a, Returning Officer Pu C.Lalthanpuia'n Certificate a hlan a ni.

Dinthar VC Bye-Election Vote hmuh dan:
1. Khualkhanenga (INC) - 92 (18.85%)
2. F. Aizama (MNF) - 164 (33.61%)
3. T. Zakimi (ZPM) - 219 (44.88%)
Vote thi - 13 (2.66%)

August ni 8, 2022 a Champhai Dinthar Veng final electoral roll tlangzarh takin a tarlan dan chuan Champhai Dinthar Vengah hian vote nei mi 652 an awm a; heng zinga 292 hi mipa niin, a dang 360 te chu hmeichhia an ni a, hmeichhe vote nei hi 68 in an tam zawk a ni.

Champhai Dinthar Vengah hian VC seat 5; General seat 4 leh Reserved seat 1 a awm a.  VC member 1, General seat atanga tling a ban tak avangin he seat bik hnawhkhat tur hian inthlan buatsaih a ni.