1837/2022-2023

Champhai, the 6th September, 2022: Vawiin khan District Disaster Management Authority (DDMA) Champhai leh Directorate of Geology & Mining tangkawp hmalaknain tunhnaia Champhai Kanan Veng leh Vengsang inrina, Aizawl-Champhai Road kam nikang tuikhur bul, Indian Oil Corporation (IOC) Filling Station siamna bula leimin leh lei tlahniam thleng chu Directorate of Geology & Mining hnuaia leilung chanchin zirmi Geologist-ten an enfiah.

Ruahtui a tlak tam chuan leimin hi hniam thla zel leh min belh zel thei a nih avangin a tul angte buaipuia hmalak a ni a. Tun dinhmunah leiminin a nghawng chin zau zawng hi a dung metre 96 leh avang metre 55 a zau nia chhinchhiah a ni a. Zirchianna atanga rawtna siam zingah leiminna chhakah tui luankawr mumal tak siam leh leiminna hmunah Z-shape in rod hmun 96 ah kilh ni se tihte a tel a. Leilung awm dan hriatchian zawk nan laboratory-a endik turin lei sample hmun 9 a mi lak a ni a. Result kimchang chu DDMA Champhaiah hriattir a ni ang.

Champhai Kanan Veng leh Vengsang inrinaa leimin chanchin zirchiang tur hian DDMA Champhai chuan Directorate of Geology & Mining-ah a tul anga hma la a, Geologist-te zir chian tir turin dilna a thlen a. DDMA dilna ngaipawimawhin Directorate of Geology & Mining hnuaia Geologist-te hian zirchianna hi an nei a ni.

Vawiin leimin leh lei tlahniam chungchang zirchianna leh hmalak dan tur enfiahnaah hian Directorate of Geology & Mining atangin leilung chanchin zirmi Geologist 3; Pu Malsawmzuala, Pi Vansangkimi leh Pi B. Vanlalhmangaihchhungi te an tel a. An ni hi Champhai atangin Inspection Convener Pu VL. Hruaimawia, District Organizer (DO), DM&R, DC Office bakah Champhai Kanan Veng leh Vengsang VC ten an tawiawm a ni.