1836/2022-2023
Khawzawl, the 6th September, 2022: Khawzawl Teachers' Association General Meeting 2022, Govt. Little Flower School, Khawzawla neih chu vawiin khan District Bawrhsap Pu C.C. Lalchhuangkima chuan khuallian niin a hmanpui.

Khuallian Pu C.C. Lalchhuangkima chuan zirtirtute chu ram leh hnam innghahna lungphum pawimawh tak, thalaite enkawltu leh an hma lam hun chhertu an nih thu sawiin, thahnemngai taka an mawhphurhnate hlen tur leh theihtawp chhuah turin a fuih a. Ruihhloin thalaite a tihbuai chhoh mek dante tarlangin, general meeting hmanga kalkhawm zirtirtute chu ruihhlo laka fihlim tura thalaite leh zirlaite a hma aia nasa zawka fuih a, helam hawi inhrilhhriatna leh inzirtirna tam zawk neihpui thin turin a chah a. Zirtirtute chu intuaithar thin tur leh naupangten ngaihnawm an tih theih tur ang zawnga zirtirna pe thei tura inchhiar zau turin a fuih bawk.

Khawzawl Teachers' Association General Meeting hi an pawl President Pu Vanlalrawna'n a kaihhruai a. Chawhma lamah report leh thusawi ngaihthlak niin, chawhnu lamah pawl danpui siam that chungchang rel a ni.