Vawiin chawhma khan I&PR Conference Hall, CHANEM Building Champhaiah National Panchayati Raj Day hman a ni a. He hun hi Pu Vanlalngaihsaka, Champhai DC chuan a hmanpui a ni.

Programme kaihruaitu Pu Vanlalngaihsaka chuan kum 1992-a India danpui siamthat vawi 73-na in a hrinchhuah Panchayati Raj system ang tak chu Mizoramah kan neih ve lemloh thu leh Village Council system-a kan kal zawk thu a sawi a. Sawrkar laipui duh dan chuan he ni hi Village Council tina hman nise tih a ni, a ti a. He ni puala kalkhawm Village Council member-te chu khawtlang  hruaitu leh khawtlang mamawhte hretu ber an nih thu a sawi a. Sawrkar atanga khawtlang hmasawnna tur  tanpuina lokalte pawh an kutah thui tak a innghat a ni, a ti a. Sawrkar scheme dawngtu tur thlanchhuah  kawngah uluk tak a survey neih anih a, a dawng tur dik tak ten an dawn chu thil tih dan dik leh tha anih thu a sawi a. Resource Person-te hnena tanga zirtur awmte zirchianga zawh belh duh an neihte zawh chianna hun atana hmang turin VC member-te chu a chah a ni

He hunah hian Pu Vanlaldika, Manager, MIZOFED  Champhai chuan Pradhan Mantri Ujjwala Yojan (PMUY) chungchang  sawifiahin zawhna awmte chhanna hun a nei a. PMUY Scheme hnuaiah hian Champhai chhehvel khaw pasarih: Mualkawi, Kelkang, Dilkawn, Melbuk (Khawnuam), Zokhawthar, Ngur leh North Khawbung-ah te hmalak anih tur thu a sawi a. PMUY hi Mizoramah kum 2017, September  Ni 15 khan hman tan a ni a. Hmeichhiate dinhmun chawikan leh hriselna vawnhim hi a tum a ni a. BPL/AAY chhungkua a hotu lu ber hmeichhia (Hmeithai) anih a, gas connection la nei ngailo a nih chuan  hemi scheme hmang hian Gas Free Connection a pek theih a ni. He scheme hian thing leh meihawl hmanga eirawngbawl a ti tlem ang a, meikhu awmlohna khua Smokeless Village siamna kawngah nasa takin a pui thei dawn a ni. May Ni 15, 2018 hma ngeia India ram  chu Smokeless Village a siam anih theih nan hemi scheme hmang hian thingtlang khuate meikhu awmlohna ‘Smokeless Village’ a siam hman vek tuma hmalak mek anih thu  tarlan a ni bawk a ni.

Resource Person dang Pu Lalchhanchhuaha, Customer Associate, SBI Champhai pawhin he hunah hian SBI Bank kaltlanga sawrkar scheme thenkhat chhawr tangkai dan  sawi zauna hun a nei a.  Pradhan Mantri Jan Dhan Yojana (PMJDY) hnuaiah  bank account zero balance-in document tulte kengin a hawn theih thu leh  he account hian Accidental Insurance cheng nuai 1 a keng tel nghal thu a sawi a. Minimum balance a awm ve lo a, loan cheng 5000 a puk theih nghal a, hmeichhhiate duhsak an ni bawk a ni, a ti a. 

Pradhan Mantri Jeevan Jyoti Bima Yojna (PMJJBY) hnuaiah Life Insurance kum tin premium cheng 330 pein cheng nuai 2 insurance-a tih theih a. He scheme hi kum 18 atanga 50 inkar tan a tih theih a, kum 55 tlin thlengin a hman theih a ni. Pradhan Mantri Suraksha Bima Yojana (PMSBY) hmang hian Accident awm thei lakah Insurance-a tih theih a. Kum 18 atanga 70 inkar tan kum tin premium cheng 12 sengin insuramce cheng nuai 2 a dil theih a ni. 

Pradhan Mantri Awaj Yojana (PMAY) hnuaiah beneficiary mi 20 vel hnenah insak tanpuina loan pek chhuah anih tawh thu leh hengah te hian hmeichhe tan za zela 8.35 leh mipa tan 8.45 a pung a awm thu a sawi a. Heng baka hian Atal Pension Yojana (APY) leh PMEGP te a sawifiah bawk a ni. SBI hmalaknain kum 2018-2019 chhung hian Bethel Kawnah SBI Branch thar hawn tum anih thu leh Champhaiah  ATM pahnih dang siam belh tum anih thu a sawi lang bawk a ni. 

Nationa Panchayati Raj Day hi tun thla April Ni 14  atanga May Ni 5 thleng awh tur Gram Swaraj Abhyaan programme kalzel hnuaia hman a ni a. Gram Swaraj Abhyaan  programme-in a tum ber chu Village Council tih chaka an kutke ngeia dinga inrelbawl thei tura buatsaih hi a ni. India ramah Panchayati Raj Day (National Self Government Day) hi   kum 2010 khan hman tan a ni.

Vawiin programme-ah hian VC member-ten resource person-te atangin Scheme thlan bikahte zirtirna an dawng a. Zawh belh duh an neihte zawhfiahna hun an nei a, an hlawkpui hle a ni. He hun hi Pu K.Lalhmuakliana, DLAO chuan lawmthu sawina hun hmangin a khar a ni.