Ram chhung hmun hrang hrangah Election Commission of India (ECI) din champha lawmna kut, kum 2011 atanga kum tina hman thin National Voters’ Day (NVD) chu vawiin khan hman a ni a. Mizoram hmun dangte rualin National Voters day vawi 8-na hi vawiin chawhma dar 11 khan Kahrawt Community Hall, Champhaiah hman a ni a. He hunah hian Champhai DC leh District Election Officer (DEO) nibawk Pu Vanlalngaihsaka chu khuallian a ni a. Kumin atana National Voters’ Day thupui thlan chu “Accessible Election” tih a ni.
Khuallian Pu Vanlalngaihsaka chuan National Voters Day 2018 hmang tura kalkhawmte chu Voters’ Day pualin chibai a buk a. National Voters Day chu India khua leh tui dik tak January ni 1-a kum 18 pumhlumte Electoral Roll-a an chuan ngei nante, inthlan huna vote nei zawng zawng ten vote an thlak ngei nan leh nakin lawka roll-a awm turte hmaih lova an awm ngei theih nana inzirtirna hunah hman thin a ni, a ti a. India ram chu khawvela mipui rorelna ram lian ber anih thu leh kan aiawha roreltute chu mipui ten vote hmanga kan thlan thin thu a sawi a. Inthlanna a vote thlak chu khua leh tui kan nih anga kan tih tur a nih thu a sawi a. Khua leh tui vote nei chin tawhte chuan voters ID neih mai duh tawk lova vote thlak nana hmang thin turin a chah a. Vote thlak theihna dikna leh chanvo kan neih hi ram hruaitu tur thlanna tura hman hi kan tihmakmawh a ni, a ti a. A hun taka Final roll tichhuah anih theih nana District Election Branch, DC Office Champhai, BLO leh Supervisor-te hnathawh chu fakawm tiin an chungah lawmthu a sawi bawk a. Khua leh tui dik tak Vote nei zawng zawngte chu kumin 2018 General Election lo awm tura vote thlak vek turin a sawm nghal bawk a ni.
He hun hi Pu Lalremruata Kullai, Election Officer chuan a kaihruai a. Pi Lalsangpuii Hmar, Addl. DC/ ERO, 24-Champhai South (ST) A/C-in National Voters Day (NVD) puala Chief Election Commissioner (CEC) thuchah chhiarchhuahna a nei a. National Voters Day thupui Accessible Election tih sawi zauna Pu Lalremruata Kullai. Election Officer-in a nei a. Pu Pachhunga, SDO (S), ERO,25-East Tuipui (ST) A/C kaihhruainain National Voters’ Day thutiam chham rualna neih a ni bawk a. Khuallian Pu Vanlalngaihsaka’n National Voters’ Day puala Election Branch, Champhai DC Office-te buatsaih Music Video a tlangzarh nghal bawk a ni.
January ni 15-a tlangzarh Electoral Roll Special Summary Revision 2018 final roll-in a tarlan dan chuan tun dinhmunah Champhai District-a MLA bial panga awmah vote nei mi 84,447 an awm mek a. Heng zingah hian hmeichhia vote nei 42,569 leh mipa vote nei 41,878 awm mekin mipa aiin hmeichhia vote nei hi 691in an tam zawk a ni. Heng bakah hian January ni 1, 2000 a piang Millenium Voter, vote nei thar mi 11 an awm bawk a ni. Champhai District-a Assembly bial panga zingah Champhai North A/C (18,557 Voters)-ah Vote nei tam berin East Tuipui A/C (14,950 Voters)-ah vote nei an tlem ber ve thung a ni. Polling Station malkhaiah chuan Zokhawthar Polling station (Champhai South,1268 Voters)-ah vote nei an tam bera, Taitawkawn Polling Station (Lengteng A/C, 53 Voters )-ah vote nei an tlem ber a ni.
He hunah hian vote nei tharte hnenah EPIC sem chhuah a ni a. NVD puala buatsaih Photo Compettition-a tithate, pakhatna Vocational Training Centre, Zotlang; pahnihna C.Lalmuankima Bethel Veng leh pathumna K.Lalramsanga Vengthlang North-te hnenah lawmman sem a ni a. MLA Constituency panga atanga Booth Level Officer (BLO) titha zual thlanchhuahte; Pu C. Vanlalvena,Teikhang BLO (Lengteng A/C), Pu C.Lalsawithanga, Thekte BLO (East Tuipui A/C); Pu C. Siamhnuna, Sialhawk I BLO (Tuichang A/C); Pu C.Lalchhuanmawia, Ruantlang I BLO (Champhai South A/C) leh Pi J.K Chingngaihdimi, Murlen BLO ( Champhai North A/C)-te hnenah chawimawina citation leh sum fai hlan nghal a ni bawk. Vawiin hun hman hi Election Officer (EO) Pu Lalremruata Kullai-in lawmthu sawina neiin a khar a ni.
NVD 2018 lawmnaah hian DC office Staff, Media lama thawkte, BLO, Supervisors, NGO hruaitu, VC, Vohbikte, Political party aiawh leh Sikul naupangte an tel a ni.
