4148/2025-2026

Champhai, dated 25th January 2026: Vawiin khan Circuit House Conference Hall, Champhaiah National Voters' Day vawi 16-na chu "My India, My Vote" tih thupui hmanga lawm a ni.

He hunah hian Champhai Bawrhsap leh District Election Officer ni bawk Pu Mohammad Aaquib chuan thu a sawi a, India hi democracy lian ber pawl niin inthlan hi democracy siamtu a ni tih a sawi a, mahni hotute leh hruaitute thlang tur chuan vote thlak hi ngaih pawimawh ngei a ngai tih a sawi. Inthlan a awm loh lai pawn election lama officer leh staff te chu an buai thin em em a, an hnathawh a fakawm tih a sawi a, BLO te pawh chutiang bawkin an thawh that vangin lawmthu a hrilh.

He hun hi Election Officer Pu Ngulzathuama chuan a kaihruai a, Champhai BDO leh Asst. Electoral Registration Officer (AERO) ni bawk Dr. Vanlalnunpuii chuan National Voters' Day thutiam chhamna hun a kaihruai. He hunah hian Electoral Photo Identity Card (EPIC) voter thar thenkhat hnenah hlan a ni a, Booth Level Officer (BLO) titha zual te hnenah lawmman sem a ni bawk. Assembly constituency (bial) tin atanga thlan niin citation leh ₹3000 pek an ni a, Pu C. Lalnunzira chuan Champhai North bial atangin a dawng a, Pu Zairemmawia chuan Champhai South bial atangin a dawng a, Pu Billy K. Lalnuntluanga chuan East Tuipui bial atangin a dawng a ni.

He hunah hian Dy. DEO leh Electoral Registration Officer (ERO) ni bawk Pu James Lalnithanga leh Champhaia Asst. Electoral Registration Officer (AERO) dang te an tel a, thu an sawi bawk a ni.

Vawiin tlai dar 4:30-ah Mizoram pum huapa National Voters' Day hmannaah Champhai hian "Effective Use of Technology in Elections" tiha titha ber lawmman an dawng dawn bawk a ni.