4147/2025-2026

Dated Khawzawl, the 25th January, 2026: Kum 2011 atanga kum tina hman thin, Election Commission of India (ECI) din champhaphak lawmna, National Voters’ Day (NVD) chu vawiin chawhma 10:30 khan Khawzawl DC Conference Hall-ah hman a ni. He hun hi Bawrhsap leh District Election Officer (DEO) ni bawk Pu K. Vanlalthiana chuan a hmanpui a ni.

District Election Officer Pu K. Vanlalthiana chuan thu sawiin electoral roll-a hming ziahluh leh vote thlak hi India khua leh tui te dikna chanvo hlu berte zing ami ani tiin he kan mawhphurhna pawimawh tak hi mitinten kan ngaih hlut thiam a tul a ni a ti a. Kan ram kalphung siam danglam theitu chu mimal tin te vote in belh khawm hi a ni tiin, District mipuite chu inthlan ngai pawimawha vote nei thei chin te'n electoral roll-ah inziaklut a, inthlanah vote thlak theuh turin a chah a. Kan ram thenawm maiah te pawh vote thlak ve theilo, democracy suala inbei mek te pawh an awm laia kan ramah zalen taka vote kan thlak thei te hi kan vanneih zia kan hriat thar leh fo thin a tul a ni a ti. Kan ram hruaitute kan thlan kawngah pawh kan pawimawhna hriain ram hruaitu thalo kan neih chuan an mahni mawh aiin keini a thlangtute mawh a ni tih hriaa, rilru fim tak hmanga vote thlak zel turin a chah a ni. BLO, NGO-te, media-te leh khawtlang hruaitute thahnemngaihna a fakawm tak zet a ni tiin thawhho zel puiah a sawm bawk.

National Voters’ Day hmanna inkhawm hi Pu K. Zorammuana, Addl. DC & Dy. DEO chuan a kaihruai a, inlawmna thu sawiin National Voters Day pual thutiam sawihona hun hman a ni. Pu Timothy R. Lalhmangaiha, EO kaihhruainain Booth thlan bik pathum, Khawzawl Vengthar, Khawzawl Electric Veng leh Khawzawl Kawnzar atangin Vote nei thar mi 15 te hnenah EPIC hlanna hun hman a ni bawk. SDC/AERO Pu Paul Rokima chuan lawmthu sawina neiin he hun hi tin a ni.