4146/2025-2026

Dated Aizawl, the 25th January, 2026: Vawiin khan India ram pumpuiah National Voters’ Day (NVD) hman a ni a. Mizoram district hrang hrangah pawh hman niin, hun pui ber chu SP Conference Hall, Aizawlah hman a ni a. Kumin thupui chu ‘My India, My Vote’ tih a ni. 

Voter naupang zawkte ram hruaitu thlannaa nasa zawka tel tura chawh phur nan India sawrkar laipui chuan January ni 25, 2011 khan Election Commission of India din ni (January ni 25, 1950) champhaphakah National Voters’ Day hi a hmang tan a. Kumin hi hman a nih vawi 16-na a ni.

Vawiina Aizawla NVD 2026 puala hun hmanah hian Dr. Lalrozama, Chief Electoral Officer, Mizoram chuan thu sawiin, kalkhawmte chu National Voters’ Day chibai a buk a. Voter tharte chu an vote dik taka hmang ngei turin a fuih a. Democracy leh election reng reng chu mipui avanga hlawhtling a ni tih sawiin, India democracy chuan mi chi hrang hrang inang lo tak tak a huam avangin ram hruaitu thlanna atana inrelbawlna (electoral machinery) tha neih a pawimawh a, election chu thianghlim, felfai, langtlang, mipui rinkai leh huap zo (inclusive) a ni tur a ni tih a sawi a. Hemi atan hian electoral roll dik leh thianghlim a ngaih thu leh BLO-te pawhin mapping an kalpui mek a, 87% vel zawh tawh a ni tih a sawi bawk.

He hunah hian Electoral Registration Officer (ERO) te, Assistant ERO te, Booth Level Officer (BLO) te bakah voter tharte leh sawm bik NGO, kohhran, political party-te leh thuthar lakhawmtute an tel a. 

Er. Lalhriatpuia, District Election Officer, Aizawl District chuan hun kaihruaiin, NVD hman tan a nih dante leh he niah hian kum 18 tling tharte’n India rama democracy chawi nun a nih zel theih nana ram hruaitu tha an thlan theih nan awareness programme hman a nih thin thu a sawi a. Aizawl District chungchang a hnuaia ziak ang hian a tarlang bawk:

MLA constituency awm zat                      12

Electoral Registration Officer (ERO) awm zat              12

Assistant ERO awm zat                            6

Polling Station awm zat                        324

Block Level Officer (BLO) awm zat                324

Voter zawng zawng zat                 292785 

Voter zinga mipa awm zat             136713 

Voter zinga hmeichhe awm zat             156072

Electoral roll revision hnuhnung ber (January 2025) atanga vawiin thlengin voter thar 1219 an awm a ni.

Pu Samuel Zodinsanga, Election Officer, Aizawl District kaihhruaiin NVD Pledge lak a ni a. Kalkhawmte chuan kan rama democracy kalphung leh inthlan thianghlim, dik leh ralmuang chawinung tur leh inthlan apianga hlauhna emaw inthliarna leh inenhranna hrang hrang emaw thlemna emaw inthununtir lova vote thlak turin an intiam a ni.

CEO, Mizoram chuan voter thar 11-te hnenah EPIC a sem a. A hnuaia district-te hnenah Best Election District Award a sem bawk a ni.

1.    Effective Use of Technology in Elections – Champhai 

(QR code scanner hmang tangkaiin Polling Parties-te training attendance lak a ni; ‘Election on Duty’ sticker hman sual a nih loh nan election atana vehicle hmanahte QR code dah a ni.)

2.    Election Management and Logistics – Aizawl 

(Mizorama mihring tamna berah polling station leh polling party tam tak hnehsawh takin an enkawl a, tlin takin election an conduct thin.)

3.    Innovative Voter Awareness Initiatives – Mamit 

(‘Kalchilh Campaign’ hmangin vantlang hmunahte nitina inhlawhchawp ‘daily wagers’-te voter awareness campaign neihpui thin a ni.)

4.    Training and Capacity Building – Aizawl

5.    Model Code of Conduct Implementation and Enforcement – Mamit 

(He category-ah hian National Level Award dawng thei khawpin thlei bik nei lovin MCC bawhchhetute an bawhzui a, MCC violation an vil uluk a ni.)

Pi F. Lalnisai, Assistant CEO, Mizoram tarlan danin, he’ng category-te hi National Voters’ Day 2026 puala Election Commission of India-in Best Election District Award Competition a buatsaiha theme-te a ni a. He inelna atan hian DEO Office hrang hrang atanga nomination lut chu Chief Electoral Officer Chairman-na hnuaia endik niin, he’ng district tithate hi thlanchhuah an ni.

Lawmman sem zawh hian sawm bikte atanga thu tawi ngaihthlak niin, Pu James Miahlung, Dy. Chief Electoral Officer, Mizoram chuan lawmthu sawiin hun a khar a ni.