No.3792/2021-2022
Dated Aizawl, the 25th January, 2022: Kum 2011 atanga kum tina hman thin, Election Commission of India (ECI) din champhaphak lawmna hun National Voters’ Day (NVD) tum 12-na chu vawiin chawhma khan mitin huapzo, banphak leh tel vek theihna tura inthlanna buatsaih, ‘Making Elections Inclusive, Accessible and Participative' tih thupui hmangin I&PR Auditorium, CHANEM Building-ah neih a ni. He hun hi Bawrhsap leh District Election Officer (DEO) ni bawk Pi Maria C.T. Zuali chuan a telpui a ni.

District Election Officer Pi Maria C.T. Zuali chuan kalkhawmte National Voters' Day puala chibai bukin, vote nei tharte duhsakna a hlan a. Inthlang ram democracy a awm kan nih avangin kan awiawha rorel turte kan thlang thin a, chumi tur chuan dikna leh chanvo kan neih vote hlu tak hi tangkai leh dik taka hman thiam a tul a ni, a ti a. Mipuite chu vote neih duh tawk mai lova, inthlan huna vote thlak ngei turin a sawm a ni.

Vote nei ten vote an thlak vek theihna turin ECI in theihtawp a chhuah thin thu sawiin, mitinte banphaka vote thlakna hmun siam a nih theih nana hmalaknate a sawifiah bawk a. Khua leh tui tha ni tura dikna leh chanvo kan neihte hre reng chunga mawhphurhna kan neih theuhte hlenchhuah kawngah mitinte kan inenfiah a tul a ni, a ti bawk. Vote nei tharte chu a lawmpui thu sawiin, mahni chhia leh tha hriatna hmanga ram hruaitu tur thlanga vote thlak thin turin a chah a. Inthlan buaipuia puibawmtu hrang hrangte chu fakawm tiin, BLO te chungah lawmthu a sawi a. Vote nei zawng zawngte duhsakna hlanin mipui siam sawrkar tha din turin dikna leh chanvo an neihte tangkai taka hmang chhuak thiam turin a chah nghal bawk a ni.

He hunah hian Special Summary Revision of Electoral Roll, 2022 neih zawh taka Champhai District chhunga Assembly Constituency pathum atanga Booth Level Officer (BLO) thawk tha thlanchhuah mi pathum, 23-Champhai North A/C atangin 23/25 Kahrawt-II BLO Pu C.Biakthanzauva, Teacher, Govt. L.M Middle School, 24-Champhai South A/C atangin 24/2 Chhungte BLO Pu R.L Hmingthanzauva, Teacher, Chhungte Primary School leh 25-East Tuipui A/C atangin 25/5- Khuangleng BLO Pu F.Lalvulliana, Teacher, Khuangleng Middle School-te hnenah District Election Officer-in chawimawina thuziak cheimawi leh sumfai Rs. 3,000/- theuh a hlan a, vote nei tharte hnenah EPIC semchhuah a ni bawk.

He hun hi Pu Lalnunfela Chawngthu, Election Officer, Champhai chuan a kaihruai a. Pu Obed Lalmalsawma, SDC Champhai kaihhruainain National Voters’ Day thutiam lak a ni a. Pu Lalhriatrenga Khiangte, LDC, Election Branch, DC Office-in lawmthu sawiin hun a khar a ni.