No.3793/2021-2022

Aizawl, the 25th January 2022 : Ram chhung hmun hrang hrang rualin vawiin khan Mizoramah pawh National Voters’ Day(NVD) vawi 12-na hman a ni a. State huapa he ni hmanna, Election Department buatsaih, SAD Conference Hall MINECO-a neih chu Chief Secretary Dr. Renu Sharma in a hmanpui a ni.

Dr. Renu Sharma chuan mipui te rorelna democracy bulthum pawimawh tak chu inthlanna felfai leh thianghlim neih hi a ni tiin hemi kawngah ram ang pawhin India chuan a ti tha hle tiin a sawi a. Kumina NVD thupui inthlanna, mitin huap, mitin banphak leh mitin te tel theihna tura buatsaih leh hma lak chu mipui rorelna democracy pawhin a tum ber a ni tiin a sawi. Mizoram LegislativeAssembly inthlanna leh Parliamentary inthlanna neih tawh te chu boruak muanawm tak hnuaiah felfai, thianghlim leh langtlang taka buatsaih nia a hriat thu sawiin Chief Secretary chuan hei hi state leh mipui ang pawha kan inchhuanna tur a niin ka hria a ti a. Tlawmngai pawl hrang hrang te, Civil Society Organizations te nen kum tam tak thawhhona tha tak neiin, kan thawk tlanga, hemi kawngah hian an thawhhlawk hle a,vawiinah hian an hnenah lawmthu ka sawi a ni, a ti. Covid hripuiin mipuite a chenchilh chung pawha hlawhtling taka, vote tla zat tlahniam chuang lo chunga Serchhip leh Tuirial Assembly Bial a By-Election neih te chu thil lawmawm tak nia a hriat thu a sawi bawk.

Chief Secretary hian kum 18 tling voters’ list a tel thar, voters thar mi 10 hnenah an EPIC a hlan a. Booth Level Officer (BLO) thawk tha mi 3 – Pu Vanlaldinpuia, Pu H. Laltlanthanga leh Pu Lalngaisanga te hnenah BLO Award a hlan bawk

He hunah inlawmna thusawitu Pu P. Jawahar, IAS, Chief Electoral Officer chuan National Voters’ Day hman dan leh a pawimawhna te a sawi. NVD 2022 puala Chief Election Comissioner, Election Commission of India Pu Sushil Chandra thuchah chu programme a kalkhawm ten an ngaithla a. CEC chuan inthlanna dan ramin a neih, Representation of People’s Act chu tunhnaia siam danglam a nih thu sawiin kum khata kum tling, vote nei thei te inziahluhna hun(Summary Revision) tum khat chiah neih thin chu kum khata tum li lai inziahluhna hun siam a nih tur thu leh EPIC leh Aadhar te inthlunzawm a nih tur thu te a tarlang a ni. NVD thutiam sawina pawh neih a ni a. Joint CEO Pu David L. Pachuau in lawmthu sawiin programme a titawp a ni.

Mizoram Sawrkar Department hrang hrang uaptu Secretary & Commissioner te, tlawmngai pawl hrang hrang hruaitute bakah Mount Carmel zirlai naupang te NVD programme ah an tel a ni.

National Voters’ Day hi kum 2011 atang khan kum tin January ni 25 a hman thin niin January ni 25, 1950 khan Election Commission of India hi a ding tan a. Hemi ni hriatrenga ni pahfawmin vote nei thar ten vote thlaka mipui rorelnaah an chanvo a hlenchhuah theih nan vote thlak pawimawhzia inzirtir nan leh inhrilhhriatna ni atan he ni hi hman thin a ni. Kum tin thupui hrang hrang neih thin a ni a, kuminah thupui atana ‘Making Elections Inclusive, Accessible and Participative’ tih chu hman a ni.