No.3794/2021-2022
Aizawl, 25th January, 2022 : Vawiin khan Human Resources Development Board Vice-Chairman Pu L.Thangmawia, Lengteng A/C bialtu ni bawk chuan a bial chhunga tunhnaia hripui leng hluarna Ngopa leh Saichal khuate a tlawh a, RAgT Test kit, Hand Sanitizer, PPE, facemask bakah Saichal VLTF hnenah Rs 30,000 leh Ngopa VLTF hnenah Rs 50,000 a hlan nghal bawk.

Pu L.Thangmawia chuan a bial chhung khaw pahnih Saichal leh Ngopa te Lockdown ngai hial khawp a hripui vei an lo pung ta thut chu pawi a tih thu a sawi a. Sawrkar leh VLTF te ruahmanna tha taka zawm chhunzawm zel turin khawtlang mipuite a chah bawk.

Pu L. Thangmawia chuan hripui do tur hian tanrualna a pawimawh a, sawrkar ang leh VC ang te, mimal ang te a do hneh chi a ni lo a, khawvel sawrkar ropui zawkte pawhin an do hneh lo a ni. Keini erawh chuan Pathian rawn chungin, thuawihna nen zo nun zemawi kalpui chungin khawsak harsa zawkte zingah chhuanchham an awm loh nan kan tan tlan a ngai a ni a ti a. Heng khuaahte lockdown puan a nih avanga chhuanchham an awm loh nan mipuite chu mit leh beng lo len a, VLTF leh sawrkar thuneitute hnenah leh a tul ang zela a hnena thlen turin a chah a. A tih theih chin apiang a lo tih nghal zel tur thu a sawi bawk.

Tun dinhmunah Saichalah Covid hri vei mi 264 an awm mek a, Ngopaah mi 255 covid vei hmuhchhuah an ni tawh bawk. Vawiinah pawh sample test runpui neih chhunzawm leh a ni.

Bialtu MLA hi Pu Vanlaltanpuia, SDO(Civil), Ngopa leh Ngopa Welfare, Aizawl hruaituten an tawiawm a ni.