3357/2022-2023

Champhai, the 25th January, 2023: Kum 2011 atanga kum tina hman thin, Election Commission of India (ECI) din champhaphak lawmna, National Voters’ Day (NVD) tum 13-na chu vawiin chawhu dar 1 khan 'Nothing like voting, I vote for sure' tih thupui hmangin I&PR Auditorium, CHANEM Building-ah neih a ni. He hun hi Bawrhsap leh District Election Officer (DEO) ni bawk Pu James Lalrinchhana chuan a hmanpui a, BLO thawk tha chawimawina neih niin, Braille EPIC leh vote nei tharte hnenah EPIC a sem chhuak nghal bawk.

District Election Officer Pu James Lalrinchhana chuan National Voters' Day pualin Champhai District-a vote nei zawng zawngte lawmpuina a hlan a, "Vote hlutna leh democracy hlut zia hre thara, ram siam thatu ni tura mawhphurhna kan neih hi kan hriat nawn leh a tul a ni", a ti. Election Commission of India (ECI) din tan ni January ni 25, 1950 denchhenin kum 2011 a?angin NVD lawm thin anih thu a sawi a. Democracy ramah mawhphurhna leh chanvo kan neihte inhrilhhriatna atan Voter-te Ni hi hman thin a ni a, India ram pum huapa program hman leh ngaihpawimawh anih avangin nakin zela ngaihtuahna siam thiam nan he ni hi hman tangkai a tul a ni, a ti a. ECI thuchhuah anga program felfai tak Champhaia hman a ni chu lawmawm a tih thu a sawi bawk.

Bawrhsap chuan vote hlutna hrechiang apiangin Electoral Roll bu-a chuan an duh thu sawiin, khua leh tui dik tak vote nei theite chu an dikna leh chanvo Voter ID nei tura ngaihven thin turin a chah a. Sawrkarin vote kan neih theihna tura ruahmanna a siamte ngaihven tura District mipuite chahin, khua leh tui dik tak zirna leh hnathawhna avanga awm remchang lote tan pawh Voter ID siam theih a ni, a ti a. Za a za vote thlak harsa thin mahse, vote tam zawk thlak anih ngei theih nan vote nei zawng zawngte chu an dikna leh chanvo vote hlu tak chu duhthlanna felfai tak siama thlak turin a chah a. Vote nei tura tulte leh adangte BLO leh Election Official-te zawhfiah reng theih an nih thu a sawi bawk a. Election Official, NGO leh Political party-te inkara thawhhona tha tak avanga roll thar lam ber siam a ni thin chu lawmawm a tih thu sawiin, thawhhona tha tak chu chhawmnun zel a pawimawh thu a tarlang bawk.

He hun kaihruaitu Pu H.Lalhruaitluanga, Election Officer, Champhai chuan ECI in huapzo vote thlak a ngaih pawimawh thu leh rualbanlote tan theihtawp a chhuah thu a sawi a. Electoral Roll 2023 puahchah kawnga BLO te hmalakna chhuanawm a tih thu a sawi bawk.

He hunah hian ECI buatsaih 'Main Bharat Hoon' hla ngaihthlak a ni a. Pi R.Lalnunkimi, DUDO/DTO Champhai kaihhruaiin National Voters’ Day thutiam lak a ni a. Special Summary Revision of Electoral Roll, 2023 neih zawh taka Champhai District chhunga Assembly Constituency pathum atanga Booth Level Officer (BLO) thawk tha thlanchhuah mi pathum, 23-Champhai North A/C atangin 23/6- Hnahlan I BLO Pu Lalrotluanga, Teacher, Hnahlan M/S; 24-Champhai South A/C atangin 24/25- Dilkawn BLO Pu F.Lalhmuliana, Teacher, Dilkawn M/S leh 25-East Tuipui A/C atangin 25/6-Zawngtetui BLO Pu J.Zakhuma, Headmaster, Zawngtetui M/S te hnenah District Election Officer-in chawimawina thuziak cheimawi leh sumfai a hlan a. BLO thawk tha leh chhuanawm tak chatuan ram panta, 25/19- Dungtlang BLO Pu C.Lalsangliana, Teacher, Govt. P/S Dungtlang chu Special Award pek a ni bawk a. Pi Esther Leihang SDC in lawmthu sawiin hun a khar a ni.

Hemi hnu hian District Election Office, Champhai buatsaihin mipuite zirtirna tinzawnin National Voters' Day Parade Awmpuipheiah neih a ni a. He hunah hian Govt. GM Higher Secondary School Electoral Literacy Club-te an tel a, Pipe Band Show- Govt. Mizo High School, Aizawl te'n an entira, National Voters' Day Parade hi mipui te'n an hlut hle a ni.

Vawiin vek khan National Voters' Day (NVD) 2023 lawmna pual hian Sawrkar Pisa leh Zirna in hrang hrangahte NVD thutiam sawirualna neih a ni bawk.