3358/2022-2023

Aizawl, 25.01.2023: Chief Minister Pu Zoramthanga chuan vawiin khan MHIP Ramhlun Venglai Branch Silver Jubilee lawmna inkhawm chu khuallian niin a hmanpui a. Ruihlo mai bakah zuk leh hmuam laka indopui kan puan a hun tawh a ni, a ti.

PCI Ramhlun Venglai Centenary Hall-a Silver Jubilee monument hawnna pual inkhawm buatsaihah hian Chief Minister Pu Zoramthanga chuan hmasawnna atan taksa hrisel a pawimawh thu a sawi a. Mimal, chhungkua leh khawtlang hmasawnna atana hriselna chu a pawimawh avangin ruihhlo mai bakah zuk leh hmuam laka fihlim chu chonaah lain, midang kaihruaitu ni turin kalkhawmte chu a chah a ni.

Chief Minister chuan mihring hi a mal ringawta kan awm chuan kan chak tawk lo thin a, inzawmkhawmna hi chakna a ni tiin, MHIP ten khawtlang nun hmasawnna atana pawl anga hma an lo lak tawhna te chu lawmawm a ti a. Ramhlun Venglai Branch MHIP ten kum 25 lai an din champha hmang theia an awm chu a lawmpui thu a sawi a ni.

Khuallian hian MHIP In, Ramhlun Venglai ah Jubilee Monument a hawng a. Jubilee hi ni hnih chhung lawm tur niin, naktuk hian bialtu MLA hovin Ramhlun Indoor Stadium ah lawmna ni hnihna hman a ni leh dawn a ni.