3359/2022-2023

Dated Serchhip, the 25th January, 2023: Vawiin khan Serchhip DC Conference Hall ah National Voters’ Day vawi 13 na hman a ni a, Pi Nazuk Kumar, IAS, District Election Officer chu khuallian a ni.

Khuallian chuan, National Voters’ Day hi voters tharte leh a ni tawh saten vote thlak huna vote kan thlak ngei tulzia inhrilhhriat nana hman thin a ni a, a pawimawh hle a ni. Mahnia ro inrel ram neih hlutzia leh ram rorelna chelhtu tur mipuiten zalen taka kan thlang thei hlutzia hi kan theihnghilh anga, vote thlakte hi kan ngaihlu lovang tih a hlauhawm em em a, mipuiten ram hruaitu tur kan thlang thin hi kan ram rorelna innghahna bulthut a ni tih i vawng reng ang u. Vawiin Voter te Ni ah hian kan district a voters tharte leh voters ni tawh zawng zawngte, vote thlak huna vote lo thlak ngei turin ka sawm nawn leh vek che u a ni, a ti. Voters thar ten Polling Booth a kal a, vote thlak kha kan lo huphurhin kan lo zak mai ang tih ka hlau hle a, chutianga han zahna tur emaw han thiam loh tur thil harsa engmah a awm lova ni. Tin, kan ram hi kan nu leh pa kan pi leh puten hah taka thisen chhuaka an lo sual chhuah kha a ni tih vawng reng ila, mi tha leh mi dik kan tihte ngeiin an kaihhruai zel theih nan voters ten dikna kan dinpui ngam tur a ni a, kan vote hlu tak hi kan hralh mai mai tur a ni lo, tiin dik taka an duhna tilang ngam turin a ngen bawk. Pi Nazuk Kumar hian Election Commission of India hle; Main Bharat Hoon tih chu a tlangzarh a, Voters thar thlanchhuah thalai thenkhatte hnenah EPIC hlanna a nei nghal bawk.

He hunah hian Pu Lalmuansanga Ralte, Deputy District Election Officer chuan kalkhawmte lawmna thu a sawi a. India ram hi inthlang ram kan ni tih kan hriaa, mahni duhzawng leh vei zawng pawh sawi theih lohna ram te nena khaikhin chuan kan vannei tak zet a ni. Inthlang rama a thlangtu (voter) ni thei kan ni hi lawm ila, a hunah vote thlak ngei pawh kan tum tur a ni. Candidate vote duh kan nei lo a nih pawhin NOTA vote theihna kan nei lehzel a, hei hian vote thlak a pawimawhzia min hrilhfiah bakah kan duhna tihlanna hun tha pek kan nihzia a tichiang em em a ni, tiin voters ten vote kan thlak ngei a pawimawhzia a sawi a ni.

Pi Lalrinchhani Ralte, Election Officer kaihhruaiina voters tharte EPIC hlanna neih a nih bakah EPIC leh Adhaar inthlunzawmna lama thawk tha, za zel a za thlunzawm thei BLO 9 hnenah te, a number a EPIC leh Adhaar thlunzawm tam (percentage ni lo) BLO hnenah te leh za zela sawmkuapariat chunglam thlunzawm thei BLO 11, an vaiin BLO thawk tha mi 21 te hnenah lawmman hlanna neih a ni a. Constituency anga chhutin 27- Tuikum AC ah hian 94.02% thlunzawm tawh niin hei hi Mizoram puma a sang ber ni mek nia hriat a ni a, 26- Serchhip ah 71.53% leh 28 - Hrangturzo ah 78.90% thlunzawm tawh niin District anga khaikhawmin 80.84% thlunzawm tawh a ni.

National Voters’ Day lawmna hi Pi Lalzikpuii, SDO Sadaar in a kaihruaia, Pi Lalnisai, SDC, AERO kaihhruaiin kal khawmte hian Voter Intiamna an nei a, Lalruatkima, SVEEP Icon chuan zaiin kalkhawmte a awi bawk a ni. Kumina Voters’ Day thupui hi “Nothing like voting, I vote for sure” (Vote thlak tluk a awm lo, Vote hi ka thlak ngei dawn) tih a ni.