3972/2024-2025

Champhai, 25th January 2025: Vawiin chhun dar 12:00 khan Champhai Circuit House Conference Hall-ah National Voters’ Day 2025 chu Champhai Bawrhsap Pu VL Remliana hovin hman a ni.

Pu VL Remliana chuan he hunah hian Democracy ṭobul sawiin, democracy-in a tum ber chu mipui ten an chunga roreltu, an ṭhatna tura ro rel ṭhin an thlan chhuah theihna kawng hawn sak a ni, a ti a. Inthlanna reng rengah mipui ten kan aiawh tur kan thlang a ni tih hre rengin, kan mimal duhamna dah ṭha chunga vote thlak kan ngaihpawimawh a ṭul a ni a ti bawk.

Pu VL Remliana chuan ram siamna bulṭhut chu Electoral Roll a chuang thei te chuan tir a, chuang thei lo te paih chhuah a nih thu sawiin he mi kawngah hian Booth Level Officer, Asst. Electoral Registration Officer, Electoral Registration Officer leh District Election Officer ten mawhphurhna pawimawh tak kan nei, a ti a. Roll-a chuang thei lo kan chuan tir chuan kan ramin a tuar dawn a, thil dik lo do turin kan zavaia kan ṭan tlan a ngai a ni, a ti.

National Voters’ Day puala hun hman hi Pu Ngulzaṭhuama, Election Officer chuan a kaihruai a. Pi Lalruatpuii Hnamte, Settlement Officer, Asst ERO ni bawk kaihhruaiin National Voters’ Day thutiam lakna hun hman niin, December ni 25, 2024-a boral Vaphai-1 BLO Pu C. Zakanglova sunna hun hman a ni bawk.

He hunah hian Champhai District chhunga Assembly Constituency pathum - Champhai North, Champhai South leh East Tuipui chhunga Booth Level Officer hna thawk ṭha te chawimawina hlan a ni a, vote nei thar mi 10 te hnenah EPIC sem chhuah a ni bawk a ni.

Best BLO dawngtute chu:

1. Champhai North A/C : Pu C. Lalchuailova 23/3 Khuangphah

2. Champhai South : MC Rualkhuma 24/15 Tlangsam

3. East Tuipui: Pu T. Kamsuanliana, 25/8 Sesih; te an ni.