3973/2024-2025

Saitual, the 25th January, 2025: Vawiin chawhma dar 11:00 am khan DC Conference Hall, Saitualah, Election Officer, Pu Lalthakima Chhangte kaihhruainain National Voters' Day 2025 lawmna hun hman a ni a, vote nei thar 8 te hnenah EPIC hlan nghal a ni.

He hunah hian District Election Officer, District Bawrhsap ni bawk, Dr. Lalngura Tlau chuan thu sawiin, Election of India din tan ni January ni 25-ah hian kum tin 2011 atang khan National Voters' Day hman thin a ni, a ti a. DEO chuan India ramah chuan Universal Adult Franchise hman nghal a ni tih sawiin, India khua leh tui, kum sawmpariat tling tawh phawt chuan vote an thlak thei a ni, a ti. Ram tam takah chuan hmeichhia te chuan vote nei turin kum tam tak an bei thin tih sawiin, India ramah chuan hmeichhia te leh rualbanlo te pawhin vote an thlak thei a, inthliar hranna awm miah loa tu pawhin vote kan nei thei chu a hlu hle a ni, a ti.

Dr. Lalngura Tlau chuan India ram chu mipui thlan sawrkar (Democracy) ram a nih angin Universal Adult Franchise chuan mipuite chu ram ro relnaah tel ve thei turin dikna chanvo min pe a, intluk tlanna min thlentu atan pawhin a pawimawh hle a ni, a ti. DEO chuan vote thlak pawimawhzia sawiin, vote hmangin ram hruaitu thlanna chu mipuite kutah a awm a ni, a ti a. Saitual District-ah service voters 457 lai an awm chu lawmawm a tih thu a sawi a, chung zinga mi pali te chu hmeichhia an ni. National Voters’ Day-ah hian vote nei tur leh vote thlak tura midangte hrilh hre turin kalkhawmte chu DEO chuan a chah nghal a ni.

National Voters' Day 2025 pual hian kalkhawmte chuan Election Officer, Pu Lalthakima Chhangte kaihhruaiin thu tiam (Pledge) an la a, Voters' Day pual Photo Competition-a ti tha zualte chu lawmman pek nghal an ni a, Pi F. Zodingpuii, DIPRO, Asst. Nodal Officer, SVEEP-in lawmman semna hi a kai hruai a, lawmman dawngtute chu:-

1.    Laltleipuia Khiangte 

2.    C. Vanlalhriatpuia 

3.    Vansangpuii

National Voters' Day hi kum 2011 atang khan Election Commission of India din champhaphak hriat reng nan kum tin hman thin a ni a, kumin thupui atan “'Nothing like Voting, I vote for sure” thlan a ni. Kum sawmpariat tling tawh te vote nei tura infuihna leh kum naupang lam ‘young voters’ ten vote an thlak ve nana infuihna tharna atan he hun hi hman thin a ni.

National Voters' Day 2025 lawmna inkhawm hi Pu Lalthakima, EO chuan a kai hruai a, Dr. Lalngura Tlau, DEO chuan thu sawiin, Photo Competition-a ti tha zualte hnenah lawmman a sem a ni a, kum tling thar mi 8 te hnenah EPIC (Electronic Photo Identity Card) sem a ni bawk. He hunah hian Department hrang hrang hotute, khawtlang hruaitute leh tlawmngai pawl hotute an tel a, Pi Christina Lalnunfeli SDC & Nodal Officer, SVEEP chuan lawmthu sawinain he hun hi a khar a ni.